मन्त्री कुशवाहाको नेतृत्वमा मधेश समृद्धिको नयाँ युग: 'भिजिट मधेश' देखि 'अयोध्यामा प्रचार प्रसार' सम्म

न्यूज ब्यूरो, जनकपुरधाम । मधेश प्रदेश सरकारको उद्योग, वाणिज्य तथा पर्यटन मन्त्रालयले आर्थिक वर्ष २०८२/८३ का लागि घोषणा गरेका प्रमुख ११ कार्यक्रमले प्रदेशको आर्थिक, सामाजिक र पर्यटकीय समृद्धिमा ऐतिहासिक मोड ल्याउने अपेक्षा गरिएको छ। यी योजनाहरू मन्त्रालयका मन्त्री ई. बसन्त कुशवाहाको दूरदर्शी नेतृत्व र दीर्घकालीन समाधानमुखी सोचको प्रतिफल हुन्। मधेशलाई रोजगारी, लगानी, पर्यटन र प्रविधिमा आत्मनिर्भर बनाउने यी कार्यक्रमहरू प्रदेशकै भविष्य निर्माणमा कोसेढुंगा सावित हुने विश्वास गरिएको छ।

"भिजिट मधेश २०८३" : पर्यटन प्रवर्द्धनमा निर्णायक पहल

प्रमुख प्राथमिकता अन्तर्गत रहेको “भिजिट मधेश २०८३” अभियान प्रदेशको धार्मिक, ऐतिहासिक र सांस्कृतिक पर्यटनलाई विश्वसामु चिनाउने ऐतिहासिक अवसरको रूपमा हेरिएको छ। जनकपुर, गढीमाई, चोहर्वा, पर्सागढी, कोशी तट, छाता पोखरी लगायत ४० प्रमुख पर्यटकीय स्थलको स्तरोन्नति कार्यलाई तीव्रता दिइनेछ। अयोध्यामा जनकपुरको प्रचारप्रसारमार्फत राम–जानकी सम्बन्धको ऐतिहासिक महत्वलाई अन्तर्राष्ट्रिय रूपमा स्थापित गर्ने तयारी पनि मन्त्रालयले गरेको छ।

मधेश लगानी सम्मेलन र डायस्पोरा समिट: पूँजी र प्रविधिको आगमन

प्रदेशमा उद्योग तथा पूर्वाधार विकासको गति बढाउने उद्देश्यसहित “मधेश लगानी सम्मेलन” आयोजना गरिने भएको छ। मधेशी डायस्पोरालाई आमन्त्रण गर्दै “डायस्पोरा समिट” को आयोजना गरिनु, प्रवासी मधेशीहरूको पूँजी, सीप र प्रविधि प्रदेशमा भित्र्याउने महत्वपूर्ण प्रयास हो। यसले विदेशमा रहेका लाखौं मधेशी मूलका नेपालीलाई मातृभूमिमा योगदान गर्न उत्प्रेरित गर्नेछ।

ट्रैवेल एण्ड टूर समिट: साझेदारीमा टेकेर समृद्धिमा उकालो

देशी तथा विदेशी पर्यटन व्यवसायी, ट्राभल एजेन्सी, होटल व्यवसायीहरूलाई एउटै मञ्चमा ल्याउने “ट्रैवेल एण्ड टूर समिट” ले मधेशमा पर्यटन पूर्वाधार विस्तार, रोजगारी सिर्जना र अन्तर्राष्ट्रिय साझेदारीको ढोका खोल्ने अपेक्षा गरिएको छ।

पूर्वाधारमा फड्को: पोडवे र मलखाद उद्योग

८ वटै जिल्ला सदरमुकामलाई जोड्ने “पोडवे” निर्माण योजना प्रदेशका दुर्गम क्षेत्रलाई पनि मुख्य प्रवाहमा ल्याउने क्रान्तिकारी योजना हो। यसैगरी, यूरिया र रासायनिक मलखाद उत्पादनका लागि सम्भाव्यता अध्ययन प्रारम्भ गर्दै कृषिमा आत्मनिर्भरताको बाटो खुल्ने देखिएको छ।

स्टार्टअप, लोन कार्ड र स्पेस सेन्टर: युवालाई रोजगारी, किसानलाई सहजता

“मधेश स्टार्ट अप कार्यक्रम” प्रदेशका नवप्रवर्तक युवाहरूलाई व्यवसायिक विकासमा सघाउने प्लेटफर्म बन्नेछ। उद्योग, व्यवसाय र कृषकहरूलाई लक्षित गरी “लोन कार्ड” मार्फत सहुलियतपूर्ण ऋण पहुँचको नीति ल्याइँदैछ। साथै, “मधेश स्पेस तथा कम्युनिकेशन सेण्टर” को सञ्चालनले वैज्ञानिक अनुसन्धान, स्याटेलाइट डाटा उपयोग र डिजिटल साक्षरतामा उल्लेखनीय टेवा पुग्नेछ।

कुशवाहाको नेतृत्व: दीर्घकालीन सोच र समावेशी विकासको मिसन

मन्त्री ई. बसन्त कुशवाहाले योजना निर्माणमा स्थानीय आवश्यकता, युवाको ऊर्जा, कृषकको भरोसा, व्यवसायीको लगानी र प्रवासीको अनुभवलाई समेट्दै समावेशी, दीर्घकालीन र व्यावहारिक दृष्टिकोण प्रस्तुत गरेका छन्। उनको नेतृत्वमा विकासका योजना केवल घोषणामा सीमित नरही कार्यान्वयनको चरणमा पुगेका छन्। रोजगारी सिर्जना, आन्तरिक तथा वैदेशिक लगानी प्रोत्साहन, पर्यटनमार्फत आम्दानी वृद्धिको सशक्त खाका प्रस्तुत गर्नु मन्त्री कुशवाहाको व्यावहारिक तथा दूरदर्शी सोचको प्रमाण हो।

उद्योग, वाणिज्य तथा पर्यटन मन्त्रालयको यो बहुआयामिक कार्यक्रम मधेश प्रदेशलाई आर्थिक तथा सामाजिक रूपान्तरणतर्फ उन्मुख गराउने प्रस्ट संकेत हो। मधेश अब आत्मनिर्भर भविष्यको दिशातर्फ अग्रसर हुँदैछ।

अयोध्यामा मधेशको ऐतिहासिक स्थलहरुको प्रचार प्रसार

मन्त्रालयले चालू आर्थिक वर्ष २०८२/८३ मा अयोध्यामा जनकपुरको प्रचार–प्रसारलाई विशेष प्राथमिकताको कार्यक्रमका रूपमा अघि सारेको छ। राम–जानकीको ऐतिहासिक सम्बन्धलाई केन्द्रमा राख्दै मन्त्री ई. बसन्त कुशवाहाको दूरदर्शी सोचअनुसार यो योजना मधेशको धार्मिक पर्यटन विकासमा कोसेढुंगा सावित हुने विश्वास गरिएको छ।

राम–जानकी मार्ग, मिथिला संस्कृति र भारत–नेपालबीचको धार्मिक र सांस्कृतिक सम्बन्धलाई मजबुत बनाउँदै अयोध्या जस्तो धार्मिक केन्द्रमा जनकपुरको पहिचान स्थापित गर्नु प्रदेश सरकारको गहिरो कूटनीतिक तथा सांस्कृतिक कूटनीतिक पहल हो। अयोध्यामा जनकपुरको सांस्कृतिक सम्पदा, धार्मिक महत्त्व, विवाहपञ्चमी महोत्सव, मिथिला कला तथा सांगीतिक संस्कृति प्रचार गर्ने विविध कार्यक्रम आयोजना गरिने मन्त्रालयले जनाएको छ।

मन्त्री कुशवाहाले अयोध्या र जनकपुरलाई "ट्विन सिस्टर सिटीज" को अवधारणा अन्तर्गत आपसी सहकार्य, धार्मिक पर्यटन आदान–प्रदान, पर्यटक आकर्षण, र अन्तर्राष्ट्रिय समुदायको ध्यान तान्ने उद्देश्य राखेर यो कार्यक्रम अघि बढाएका हुन्। यस योजनाले नेपाल र भारतबीचको धार्मिक एवं सांस्कृतिक सम्बन्ध थप प्रगाढ बनाउने मात्र नभई जनकपुरलाई अन्तर्राष्ट्रिय धार्मिक पर्यटकीय नक्सामा दृढतापूर्वक स्थापित गर्नेछ।

यस अभियानसँगै रामायण सर्किट अन्तर्गत जनकपुरको विकासमा गति आउनेछ भने अयोध्याबाट हजारौं भारतीय पर्यटकको आकर्षण जनकपुरतर्फ बढ्ने अपेक्षा गरिएको छ। मिथिलाञ्चलको गौरवपूर्ण इतिहास र संस्कृतिको प्रचार–प्रसार अब प्रदेश सीमाभन्दा बाहिर अन्तर्राष्ट्रिय मञ्चमा देखिनेछ, जुन मन्त्री कुशवाहाको दीर्घकालीन सोच र योजनाबद्ध प्रयासको नतिजा हो।

मधेश प्रदेश सरकारको यो साहसिक र दूरगामी कार्यक्रमले धार्मिक पर्यटनको प्रवर्द्धन गर्दै आर्थिक, सामाजिक र सांस्कृतिक समृद्धिको नयाँ ढोका खोल्नेछ।