विपद् बचाउ अभ्यासको क्रममा सशस्त्र प्रहरीका दुई गोताखोर प्रहरी कोशी नदीमा बेपत्ता, खोजी जारी

सप्तरी, असार २० । सप्तकोशी नदीमा बाढी तथा पहिरोबाट प्रभावितको उद्धारका लागि गरिएको अभ्यासका क्रममा सशस्त्र प्रहरी बलका दुई गोताखोर बेपत्ता भएका छन्।

बेपत्ता हुनेमा सशस्त्र प्रहरी बलका जवान सूरज साऊद र हरदेव राजबंशी रहेका छन्। जिल्ला प्रहरी कार्यालय, सप्तरीका अनुसार उनीहरू बिहीबार साँझ ४ बजे सप्तकोशी नदीमा अभ्यासका क्रममा हराएका हुन्।

सशस्त्र प्रहरी बल मधेश प्रदेश कार्यालयले आयोजना गरेको बाढी तथा भूस्खलनमा उद्धार अभ्यासको क्रममा सप्तरीको हनुमाननगर कंकालिनी नगरपालिका–१ स्थित कोशी ब्यारेजको गेट नम्बर ५४ र ५५ को उत्तरतर्फ उनीहरू बगेर बेपत्ता भएका हुन्।

उनीहरूको खोजी कार्य तीव्र पारिएको जिल्ला प्रहरी कार्यालय, सप्तरीले जनाएको छ। खोजीका लागि सुनसरी र सप्तरीबाट नेपाल प्रहरी तथा सशस्त्र प्रहरी बलको संयुक्त टोली परिचालन गरिएको छ।

सशस्त्र प्रहरी स्रोतका अनुसार, उद्धार अभ्यास अत्यन्त संवेदनशील र जोखिमपूर्ण अवस्थामा सञ्चालन गरिएको थियो। बेपत्ता जवानहरूको सकुशल फिर्तीका लागि स्थानीय प्रशासन, सुरक्षा निकाय र स्थानीयवासीहरू समन्वयमा लागिपरेका छन्।

घटनाबारे थप अनुसन्धान भइरहेको प्रहरी स्रोतले जनाएको छ।