रौतहटमा नवविवाहता महिलाको सिरियल मर्डर, एक महिनामा तीनको हत्या

न्यूज ब्यूरो, रौतहट । पछिल्लो समय रौतहटमा श्रृंखलावद्ध नवविवाहिता महिलाको हत्या सुरु भएको छ। मात्र एक महिनाको अवधिमा रौतहटमा तीनजना नवविवाहिता महिलाको हत्या भएको छ ।

जिल्लाको कटहरिया नगरपालिका १ भासेढवा गाउँमा एकजना नवविवाहिता महिलाको संकास्पद हत्या भएको छ। मृतक महिलाको श्रीमान र सासु फरार भएका छन भने ससुरा लाई प्रहरीले पक्राउ गरेको छ । एक महिनाको अवधिमा यो तेस्रो नवविवाहिताको शंकास्पद हत्या हो ।

यसअघि एक नवविवाहिताको मृत्यु प्रकरणमा उनको श्रीमान माथी प्रहरीले आत्महत्या दुरुत्साहन मुद्दा दायर गरेको थियो । तर अर्को घटना अनुसन्धानकै क्रममा रहेको छ । मंगलबार बेलुकी ८ बजे कटहरिया नगरपालिका १ भसेढवा बस्ने अनकेश यादवको श्रीमती बर्ष २२ कि अल्का यादव आफनै घरको सुत्ने कोठाको बेडमा मृत अवस्थामा फेला परेकी थिइन् । घटनाको खबर लगत्तै ईलाका प्रहरी कार्यालय कटहरिया र गरुडाको संयुक्त टोली घटनास्थलमा पुग्दा उक्त महिला उतानो परी मृत अवस्थामा रहेको, निज मृतकले वान्ता गरेको, घटना सन्कास्पद रहेको प्रहरी नायब उपरीक्षक राजन कार्कीले बताएका छन् ।

प्रहरी टोली घटनास्थल पुगेपछी मृतकका श्रीमान अनकेश यादव र सासु बर्ष ४६ की शान्ति देवी फरार रहेको कारण मृतकको ससुरा बर्ष ५१ को रामपुकार प्रसाद यादव लाई नियन्त्रणमा लिएको डिएसपी कार्कीले जानकारी दिए । मृतकको शव पोष्टमार्टमका लागि प्रादेशिक अस्पताल गौर लगिएको रौतहट प्रहरीले जनाएको छ ।

मंगलबार बेलुकी अल्काको श्रीमान, सासु, ससुरा मिलेर कुटपिट गरी घाँटी थिचेर हत्या गरिर आत्महत्या देखाउन खोजेको माईती पक्षको दाबी रहेको छ । प्रहरी नायब उपरीक्षक कार्कीका अनुसार अल्का यादवको मृत्युको घटना सम्बन्धमा गम्भीर रुपमा अनुसन्धान भइरहेको छ । उसको ससुरा संग घटनाबारे सोधपुछ जारी रहेको छ । पोष्टमार्टम रिपोर्टसंगै अनुसन्धान पूरा भएपछि घटनाबारे यकिनका साथ भन्न सक्ने प्रहरी नायब उपरीक्षक कार्कीले जानकारी दिए । यसका साथै फरार रहेका मृतकका श्रीमान र सासुको खोजी कार्य भइरहेको प्रहरीले जनाएको छ ।

दुई साता अघि मात्र श्रीमतीलाई आत्महत्या गर्न बाध्य बनाएको भन्दै कटहरिया ३ बडेरवा घर भई हाल कटहरिया बजारमा बस्ने अहमद राय भाटको छोरा बर्ष २५ का अरमान राय भाट माथी ईलाका प्रहरी कार्यालय गरुडामा आत्महत्या दुरुत्साहन मुद्दा दर्ता गरेको थियो । उनी हालसम्म फरार रहेका छन् ।

त्यस्तै गत १६ गते दुर्गा भगवती गाँउपालिका छेउ खोला किनार झाडीमा अनेक श्रृंगार बाट सजिएकी सुन चाँदीको गहना लगाएकी एक २४ बर्षिया नवविवाहिताको शव फेला परेको थियो । जिल्ला प्रहरी कार्यालय रौतहटले घटना शंकास्पद भएको भन्दै अनुसन्धान शुरु भएको छ । तर हालसम्म घटनाको कारण तथा मृतक महिलाको पहिचान खुल्न नसकेको जिल्ला प्रहरी कार्यालय रौतहटले जनाएको छ ।

दाइजोलगायत विभिन्न कारणले मधेश प्रदेशमा नवविवाहिता महिलाको हत्याको घटनामा वृद्धि भएको छ । घटनापछि राजनीतिक संरक्षण र आर्थिक चलखेलको कारण अपराधी कारबाहीबाट उम्किने गरेको कारण यस्ता जघन्य घटनाहरू दिनानुदिन बढ्दै गएको स्थानीयहरूले बताउँछन् ।