दुई मोटरसाईकलमा आएका चार नकावधारीले साढे १६ लाख लुटे

बाबु प्रेम ययदुवन्शी |
महोत्तरी, २६ असार । महोत्तरीमा दुई मोटरसाईकलमा आएका चार नकावधारीले १६ लाख ५२ हजार लुटेर फरार भएका छन ।

जलेश्वर बर्दिवास सडक खण्डको मनरा सिस्वा नगरपालिका वडा नं. ६ जावख र सरपल्लोको विचको बाटोमा अपरान्ह करिव चार बजे उक्त रकम हथियार देखाई नवाकधारीहरु लुटेर भागेका थिए ।

मनरा सिस्वा नगरपालिका वडा नं. ७ सरपल्लोमा प्रभु मनि ट्रान्सफर संचालनमा रहेकोमा उक्त मनि ट्रान्सफरका कर्मचारी संजिव साहले जलेश्वर स्थित लक्ष्मी वैंकवाट १३ लाख ९३ हजार र प्रभु वैंक जलेश्वरबाट २ लाख ५९ हजार गरि जम्मा १६ लाख ५२ हजार ज ६ प ५७६४ नं. को मोटरसाईकलमा सरपल्लो तिर लिएर आउदै गरेकोमा उनी लुटिएका हुन ।

उनीहरु रकम लुटेर जलेश्वर बर्दिवास सडककै उत्तर तिर भागेको पिडितको भनाई छ ।

लुटेरा समुहको दुवै मोटरसाईकलको नम्बर आफुले हेर्न नसकेको र उनीहरुले नकाव लगाएकोले अनुहार समेत चिन्न नसकेको पिडितले प्रहरीलाई जनाएको जिल्ला प्रहरी कार्यालय महोत्तरीका प्रहरी नायव उपरिक्षक खगेन्द्र वहादुर खडकाले जनाए ।

उनले तत्कालै प्रहरीलाई सकृय बनाइएकोले अपराधी छिटटै पकडमा आउने बताए ।