धनुषाको बीरेन्द्रबजारमा विद्युतको नयाँ सव-स्टेशन सँचालन, कम भोल्टेजको समस्या अब नहुने

न्यूज ब्युरो, जनकपुरधाम । धनुषाको गणेशमानचारनाथ नगरपालिकाको सदरमुकाम बीरेन्द्रबजारमा विद्युतको नयाँ सव स्टेशन सँचालनमा आएको छ ।

स्थानीय बासिन्दाहरूले लामो समयदेखि झेल्दै आएको विद्युत आपूर्तिको समस्यामा अब उल्लेखनीय सुधार आउने अपेक्षा गरिएको छ । नेपाल विद्युत प्राधिकरण अन्तर्गत धनुषाधाम वितरण केन्द्रले बिरेन्द्रबजारमा नयाँ विद्युत सबस्टेशन औपचारिक रूपमा सञ्चालनमा ल्याएको छ।

मधेश प्रदेश अन्तर्गत रहेको नेपाल विद्युत प्राधिकरणको योजना व्यवस्थापन निर्देशनालयको आयोजनामार्फत निर्माण सम्पन्न गरिएको यो सबस्टेशनले स्थानीय विद्युत प्रणालीमा क्रान्तिकारी परिवर्तन ल्याउने विश्वास गरिएको छ।

आयोजनाका प्रमुख इन्जिनियर बीरेन्द्र कुमार झाले जानकारी दिएअनुसार, ूयस सबस्टेशनको सञ्चालनले बिरेन्द्रबजार आसपासका बासिन्दाले लामो समयदेखि भोग्दै आएको लो(भोल्टेज समस्या समाधान हुने मात्र होइन, विद्युत आपूर्तिको स्थायित्वमा समेत आमूल परिवर्तन ल्याउनेछ। साथै हाल करिब २० किलोमिटर टाढाको धनुषाधाम सबस्टेशनबाट सञ्चालित गोदार फिडरको लोड घटाउन पनि यसले उल्लेखनीय योगदान पुर्‍याउनेछ।

धनुषाधाम वितरण केन्द्रका प्रमुख रोशन कुमार सिंहले सबस्टेशन सञ्चालनसँगै अब बिरेन्द्रबजार र धनुषाधाम सबस्टेशनबीचका केही फिडरहरू रिङ मेन फिडर प्रणालीमा रूपान्तरण गरिने बताए। यस प्रविधिको प्रयोगले विद्युत आपूर्तिको विश्वसनीयता अझ बलियो बनाउनेछ।

उक्त आयोजनाको सफल सम्पन्नतामा महत्त्वपूर्ण योगदान दिने सबैलाई नेपाल विद्युत प्राधिकरणले विशेष धन्यवाद व्यक्त गरेको छ। धनुषा क्षेत्र नम्बर १ का प्रदेश सांसद माननीय संजय कुमार महतो, गणेशमानचारनाथ नगरपालिकाका मेयर जीतनारायण यादव, स्थानीय वडाध्यक्षहरू तथा धनुषाधाम–४ का वडा अध्यक्ष मनोज कुमार यादवलाई प्राधिकरणले विशेष आभार व्यक्त गरेको छ।

नेपाल विद्युत प्राधिकरणले आगामी दिनहरूमा सेवा प्रवाहलाई अझ प्रभावकारी, स्थिर र भरपर्दो बनाउँदै लैजाने प्रतिबद्धता व्यक्त गरेको छ। स्थानीय जनताले यो नयाँ प्रगतिको स्वागत गर्दै विद्युत सेवा अझ सुलभ, गुणस्तरीय र व्यवस्थित हुनेमा आशा व्यक्त गरेका छन्।