सात मधेस केन्द्रित दल मिलेर बनेको ‘सङ्घीय लोकतान्त्रिक मधेसी मोर्चा’ घोषणा हुँदै

न्यूज ब्यूरो, जनकपुरधाम । मधेस केन्द्रित दलहरूले भोली बिहीबार संघीय लोकतान्त्रिक मोर्चाको घोषणा गर्ने भएका छन् । भोलि घोषणा हुने मोर्चामा सात दल रहने बताइएको छ ।

मोर्चाको नाम संघीय लोकतान्त्रिक मधेसी मोर्चा रहने छ । यसअघि आठ दलको मधेसी मोर्चाको तयारी भइरहेको थियो तर यो मोर्चामा अशोक राई नेतृत्वको जनता समाजवादी पार्टी नरहने बताइएको छ ।

सात दलको मोर्चामा उपेन्द्र यादव नेतृत्वको जनता समाजवादी पार्टी नेपाल, महन्थ ठाकुर नेतृत्वको लोकतान्त्रिक समाजवादी पार्टी नेपाल, डा. सीके राउत नेतृत्वको जनमत पार्टी, राजेन्द्र महतो नेतृत्वको राष्ट्रिय मुक्ति पार्टी नेपाल, हृदयेश त्रिपाठी नेतृत्वको जनता प्रगतिशील पार्टी, रेसम लाल चौधरी संरक्षक रहेको नागरिक उन्मुक्ति पार्टी र वृशेषचन्द्र लाल नेतृत्वको तराई मधेस लोकतान्त्रिक पार्टी रहने छ ।

मोर्चाको आलोपालो नेतृत्व गर्ने बताइएको छ । अहिले पहिलो चरणमा जसपा नेपालका अध्यक्ष उपेन्द्र यादवले नेतृत्व गर्ने बताएको छ । स्रोतका अनुसार यो सात दलीय मोर्चामा नागरिक उन्मुक्ति पार्टी पनि नरहने अवस्था रहेको देखिएको छ ।

लोसपा नेपालका एक नेताले भने, ‘अहिलेसम्म नागरिक उन्मुक्ति पार्टीको नाम पनि छ, तर भोली घोषणा हुने बेलासम्म रहन्छ कि रहँदैन ठेगान छैन ।’

सात वटै दलका अध्यक्षको उपस्थितिमा मोर्चाको घोषणा हुने बताइएको छ ।

काँग्रेस र एमाले नेतृत्वको गठबन्धन सरकारले संविधान संशोधन गरेर थ्रेस होल्ड बढाउने, समानुपातिक निर्वाचन प्रणाली हटाउने र दुई दलीय प्रणालीको सरकार बनाउने चर्चा बाहिर ल्याएपछि मधेसवादी दलहरू एकीकृत भएका थिए । जनता प्रगतिशील पार्टीका अध्यक्ष हृदयेश त्रिपाठीले मोर्चा गठनका लागि प्रयास गरेका थिए ।

उनी मधेस केन्द्रित दलका हरेक नेताहरूलाई भेटी मोर्चाका गठनका लागि कन्भिन्स गरेका थिए । सो क्रममा केही बैठकहरू पनि बसेका थिए ।

बैठक बसेर दुईटा कार्यदल गठन गरिएको थियो । मोर्चाको मापदण्ड र अचारसहिंता तथा साझा मुद्दा तय गर्न एउटा कार्यदल बनेको थियो भने सबै दलको राय बुझेर मोर्चा गठनका लागि एउटा अर्को कार्यदल पनि गठन भएको थियो । दुइटै कार्यदलले आ(आफ्नो काम गरेर प्रतिवेदन बुझाएपछि मोर्चाको घोषणा हुन लागेको हो ।