मधेसमा सुरक्षाकर्मीलाई "हाईअलर्ट" मा बस्न मधेस सरकारको निर्देशन

न्यूज ब्यूरो |
जनकपुरधाम, १९ असार । विगत केही दिनदेखि भईरहेको अबिरल बर्षाका कारण तराई मधेसको अवस्थालाई मध्यनजर गर्दै मधेस सरकारले तयारी अवस्थामा बस्न निर्देशन दिएका छन् ।

केही दिन यता भै रहेको निरन्तरको वर्षाका कारण प्रदेश नं. २ मा देखिएको बाढीलाई मध्यनजर गर्दै प्रदेश सरकारले आठवटै जिल्लाका प्रमुख जिल्ला अधिकारीको नेतृत्वमा रहेको विपद व्यवस्थापन समितिलाई स्थानीयतहको समितिलाई राहत र उद्धारको लागि तयारी अवस्थामा रहन निर्देशन दिएका छन ।

मन्त्री परिषदको आजको बैठकले बाढी पिडित क्षेत्रको पहिचान गरि पूर्व तैयारी गर्न समेत निर्देशन दिएका छन ।

अघि आजै विहान मन्त्रिपरिषद्को कार्यालयमा बसेको विपद् व्यवस्थापन समितिको बैठकमा मुख्यमन्त्री लालबाबु राउतले सुरक्षाकर्मीलाई २४ औ घण्टा राहत तथा उद्धारका लागि हाइएलर्टमा बस्न निर्देशन दिनु भएको थियो ।

प्रदेश नं। दुईको तीन वटा जिल्ला सर्लाही, रौतहट र पर्सा हाल सबै भन्दा बढी प्रभावित रहेकोले उक्त क्षेत्रमा जनधनको क्षति नहुन दिनका लागि सुरक्षाका ४ वटै निकायलाई हाई अलर्ट रह्न निर्देशन दिइएको हो ।

प्रदेश सरकार ८ हजार घरपरिवारलाई तत्काल राहत पुग्ने तयारी गरेको आन्तरिक मामिला तथा कानून मन्त्री एवम् विपद् व्यवस्थापन समितिका संयोजक ज्ञानेन्द्र यादवले जानकारी दिनु भएको छ ।