कुलमानसँग धनुषाधामका मेयर मण्डलको अर्जी–'बिजली बिल ढिलो बुझाउँदा २५% जरिवाना नलिनु'

न्यूज ब्यूरो, जनकपुरधाम । धनुषाधाम नगरपालिकाका मेयर बालेश्वर मण्डलले बिद्युत बिल बुझाउन ढिलो भएको अवस्थामा २५ प्रतिशतको जरिवाना नलिन अर्जी लगाएका छन् ।

शनिबार धनुषाधाम नगरपालिकाले आयोजना गरेको एक कार्यक्रममा सहभागी हुन धनुषाधाम पुगेका विद्युत प्राधिकरणका निर्देशक कुलमान घिसिँगसँग मेयर मण्डलले नगरका जनताको लागि सो अर्जी लगाएका हुन् ।

मधेश प्रदेशभरिमै विद्युत प्राधिकरणको धनुषाधाम वितरण केन्द्र चुहाबट नियन्त्रणमा प्रथम स्थान ल्याएकोप्रति गौरव प्रकट गर्दै मेयर मण्डलले गरिब विपन्नहरुलाई विद्युत महसुल बुझाउन एक दुई महिना ढिलो हुँदैमा लिँदै आएको २५ प्रतिशत जरिवाना नलिन आग्रह गरे । उनले यो नियमलाई परिमार्जन गरी आम नागरिकलाई सहुलियत प्रदान गर्ने गरी व्यवस्था मिलाइदिन माग गरे ।

५१ किलोको माला लिएर स्वागत लिएका कुलमान घिसिँगले मेयर मण्डलसँग समयसीमा नाघेपछि लाग्ने जरिवानाप्रति विचार गरी सहुलियत प्रदान गर्ने प्रतिवद्धता जाहेर गरे ।

धनुषाधाम नगरपालिकाकी उपमेयर विद्या देवी भूजेल र मेयर मण्डलले सँयुक्त रुपमा माला लगाउँदै भव्य स्वागत गरेका थिए । सो क्रममा मेयर मण्डलले यहाँका किसानहरुको बारेमा गम्भिर जानकारी गराउँदै उनीहरुको सिँचाईमा हुनुपर्ने सुविधाप्रति ध्यान दिन आग्रह गरे ।

स्वागत एवम् सम्मान कार्यक्रममा स्वागत मन्तव्य अभियानी प्रमोद यादवले राखेका थिए ।

कार्यक्रममा विद्युत प्राधिकरण धनुषाधाम शाखाका प्रमुख रोशन सिंह, वडा नम्बर ५ का वडाध्यक्ष वडा अध्यक्ष ईन्द्र कुमार महतोसहित वडाध्यक्षहरु जय नारायण यादब, ऋषि केश लामा, लक्ष्मी साह र मनोज यादवले सहभागिता जनाएका थिए ।

सशस्त्र प्रहरी उपरीक्षक गणेश खनाल , ईलाका प्रहरी कार्यालय धनुषाधामका प्रहरी निरीक्षक कृष्ण भण्डारीले कार्यक्रममा सुरक्षा व्यवस्था चुस्त बनाएका थिए ।

सो कार्यक्रमको लागि धनुषाधाम नगरपालिकाका प्रमुख प्रशासकीय अधिकृत सँजीत दास, अधिकृत विवेक पण्डित लगायतका कर्मचारीहरुले अतिथि सम्मान, स्वागत र अन्य विधिको लागि व्यवस्था मिलाएका थिए ।