विदेह नगरपालिकाभित्रको सरकारी वा नीजि घरहरुको नक्सा पास अनिवार्यः मेयर दास

न्यूज ब्यूरो, जनकपुरधाम । धनुषाको विदेह नगरपालिकामा रहेको समुदायिक तथा नीजि भवनहरुको नक्सा पासको नियम लागू गरिएको छ ।

नगरपालिकाभित्र बनेको संचरनाहरुको तीन महिनाभित्रै नक्सा पास गराउनुपर्ने नियम लागु गरिएको नगर प्रमुख बेचन दासले जानकारी दिए । उनका अनुसार, नगरभित्र बनेको समुदायिक वा नीजि घरहरुहरुलाई नियमन गर्नको लागि नक्सा पास गराउनुपर्ने प्रावधान लागू गरिएको हो ।

नगरभित्र बलियो संरचना, कित्ताकाटको प्रावधान लागू गर्न नक्सा पासको कार्यविधि लागू गरिएको बताए ।

स्थानीय सरकार सञ्चालन ऐन २०७४ दफा १२मा प्रत्येक वडा समितिले निजी घर तथा घर परिवारको लगत राख्नुपर्ने प्रावधान छ । स्थानीय तह सरकार सञ्चालन ऐनको परिच्छेद ७ मा रहेको दफा ३४ अनुसार घर बनाउँदा अनिवार्य रुपमा नक्सा पास गर्नुपर्ने हुन्छ भने दफा ३५ अनुसार नक्सा संशोधन गर्न वा घरको मोहोडा परिवर्तन गर्न नगरपालिकाले तोकेको थप रकम तिर्नपर्छ ।

विदेह नगरपालिकाको वडा नम्बर १ देखि ९ सम्मको वडाभित्र बनेको घरहरुको अभिलेखिकरण, राजश्व असुलीको लागि नक्सा पास अनिवार्य गरिएको हो । नक्सा पास गराउनको लागि नगरपालिकाले एक मापदण्ड समेत तयार पारेको हो । सोही मापदण्ड अनुसार बनिसकेको घरलाई पनि अभिलेखिकरण गर्ने योजना रहेको नगरपालिकाका प्रमुख प्रशासकीय अधिकृत दीपेन्द्र कुमार साहले बताए ।

अधिकृत साहका अनुसार, नगर प्रमुख दासको निर्देशनमा सर्वसहमतिबाट नक्सा पासको मापदण्ड लागू हुनेछ । निर्माण भईसकेका घरहरुको माघ १० गतेदेखि तीन महिनाभित्रमा नक्सा पास अनिवार्य हुनेछ । नक्सा पास पछि गराए दोब्बर वा तेब्बर राजश्व तिर्नुपर्ने मापदण्डमा उल्लेख छ ।