बर्दिवासमा रामजानकी फन पार्क बनाउँदै मधेश सरकार

न्यूज ब्यूरो, जनकपुरधाम । मधेश प्रदेशको गौरवको आयोजनाको रुपमा मानिएको बर्दिवासस्थित रामजानकी फनपार्क निर्माण हुने भएको छ ।

बर्दिवास नगरपालिकाले वडा नम्बर १४ स्थित रातु नदीको तटवर्ती क्षेत्रमा रामजानकी फनपार्क निर्माणका लागि जग्गा व्यवस्थापन प्रक्रिया अघि बढाइएको छ ।

मेयर प्रहलाद क्षेत्रीले बर्दिवासको पहिचान, पर्यटन र संस्थागत विकाशमा टेवा पु¥याउने उद्देश्यले रामजानकी फन पार्क निर्माणको योजना अघि सारेको बताए । रातु किनाराको ४० विघा क्षेत्रफलमा निर्माण हुने रामजानकी फन पार्कको प्रारम्भिक लागत ४२ करोड रुपैयाँ अनुमान रहेको छ । सोका लागि नगरपालिकाले जग्गा व्यवस्थापनको औपचारिक प्रक्रिया शुरु गरिसकेको छ ।

नगरपालिकाका प्रमुख प्रशासकीय अधिकृत राममणि अधिकारीका अनुसार फनपार्क निर्माणका लागि आवश्यक ३९ बिघा जग्गामध्ये ३६ विघा ऐलानी र सवा ३ बिघा जति नम्बरी जग्गा छन् । नम्बरी जग्गा अधिग्रहणका लागि नगरपालिकालेसार्वजनिक सूचना प्रकाशित गरी प्रक्रिया अघि बढाइसकेको उनले बताए । ऐलानी जग्गा उपयोगका लागि पनि बर्दिवास मालपोत कार्यालयमार्फत प्रक्रिया शुरु भइसकेको छ ।

मालपोतबाट जिल्ला प्रशासन र अभिलेख विभाग हुँदै मन्त्रिपरिषद्को निर्णयले यसको टुंगो लाग्छ । त्यसपछि मालपोत र नगरपालिकाबिच जग्गा अधिग्रहणका लागि सम्झौता हुने कानुनी प्रावधान छ । उनले भन्नुभयो, ‘‘जग्गा अधिग्रहणका लागि बर्दिवास मालपोतमार्फत प्रक्रिया अघि बढी सकेकाले सम्भवतः केही समयपछि नै हामी संरचना निर्माण सुरु हुनेछ ।’’ उनले आफैँमा महत्वाकांक्षी योजना मानिएको यो पार्कको डिपिआर पनि तयार भइसकेको बताए ।

ग्रीन टेक कन्सलटेन्ट प्रालिले तयार पारेको डिजाइन अनुसार पार्कमा जनकपुरधामको प्रसिद्ध जानकी मन्दिरलाई प्रतीकात्मक रुपमा डिजाइन गरिएको छ ।

यसैको महत्त्व दर्शाउन पार्कको नाम नै ‘रामजानकी’ राखिएको छ । यसका साथै जलक्रीडाका लागि वाटर फन पार्क, वनवाटिका (बोटानिकल पार्क), बाल मनोरञ्जन, सांस्कृतिक संग्राहालय, रेस्टुरेन्टलगायत मनोरञ्जनका विविध आयाम समायोजन गरिएको डिपिआरमा उल्लेख गरिएको छ ।

सार्वजनिक चासो र चर्चाको विषय बनेको रामजानकी फन पार्कलाई एकैपटक ५० हजार पर्यटकले अवलोकन गर्न सकिने कन्सलटेन्टका इन्जिनियर आश्रम श्रेष्ठले बताए ।

उनका अनुसार फन पार्कको संरचना ५ वर्षभित्र निर्माण सम्पन्न हुने गरी डिजाइन गरिएको छ । पार्कमा विविध मनोरञ्जन, आधुनिक सुविधा र स्वेर परिकल्पनासाथ संरचना डिजाइन गरिएको श्रेष्ठले बताए । सो परियोजनालाई नगर कार्यसमितिको बैठकले पनि सर्वसम्मत अनुमोदन गरेकाले कार्यान्वयनको चरणमा प्रवेश गरेको उनले बताए ।