धनुषाको न्यू लाईफ भिजन स्कूलले २५ डिसेम्बरमा भव्य तुलसी पूजन मनाउने

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिका वडा नम्बर ४ खजुरीस्थित रहेको न्यू लाईफ भिजन सेकेन्डरी स्कूलले आउँदो २५ डिसेम्बर बुधबारको दिन भव्य तुलसी पूजन मनाउने भएको छ ।

विद्यालयका प्रबन्धक निर्देशक सुजित कुमार यादवले प्रत्येक बर्ष २५ डिसेम्बरको दिन तुलसी पूजन मनाउँदै आएकोमा यसपाली भव्य तरिकाले तुलसी पूजन मनाउने तयारी गरिएको बताए ।

उनले आफ्नो धर्म सँस्कृतिलाई जगेर्ना र बालबालिकाहरुमा पौराणिक मूल्य मान्यताको ज्ञान भर्न तुलसी पूजनको महत्वसहित भव्य तुलसी पूजन कार्यक्रमको तयारी गरिएको बताए । उनले भने,–“तुलसी पूजन त साधारण रुपमा हामी गर्दै आएकै छौँ, तर विद्यालयमा बालबालिकाहरुको सँख्या बाक्लो रहकोले यसलाई भव्य तरिकाले मनाउने तयारी गरेका छौँ ।”

गत बर्ष पनि यस विद्यालयमा २५ डिसेम्बरको दिन तुलसी पूजन गरिएको थियो । जनकपुर लगायत विभिन्न जिल्लामा २५ डिसेम्बरमा पश्चिमी सभ्यताको पर्व क्रिसमस डे मनाउने गरिन्छ । न्यू लाईफ भिजन स्कूल र जनकपुरकै केही विद्यालयहरुले तुलसी पूजन मनाउँदै आएको छ ।

तुलसी पूजन धार्मिक र पौराणिक मान्यताको पर्वको रुपमा मनाइन्छ । जिँउदो बोट जो २४सै घण्टा अक्सिजन दिने वैज्ञानिक कारण पनि रहेको छ ।