धनुषामा सबभन्दा बढी महिला तथा बालबालिका पीडित : ईन्सेक

न्यूज ब्यूरो |
जनकपुरधाम, १२ असार । धनुषामा सबभन्दा बढी महिला तथा बालबालिकाहरु पीडित भएको एक तथ्याँकले देखाएको छ ।

ईन्सेक धनुषाले जनकपुरमा मँगलबार आयोजना गरेको समिक्षा कार्यक्रममा गत ६ महिनाभित्र मात्र ४२ ओटा घटना प्रतिघटनाको तथ्याँक सार्वजनिक गर्दै सबभन्दा बढी महिला तथा बालबालिकाहरु पीडाको शिकार भएको बताइएको छ ।

राज्य तथा गैरराज्य पक्षबाट गरी महिला हिँसा मात्र ३१ वटा भएको बताइएको छ भने कुटिपटको घटना ४, बोक्सीकाण्ड २, मानवबेचविखन १, सार्वजनिक अपराध २, बम विस्फोट घाईते १ , बालविवाह १ गरी ४२ घटना दर्ज गरिएको जनाइएको छ ।

महिला हिँसाका घटनामा ६ महिनाको अन्तरालमा प्रतिवेदन अनुसार १६ महिला पीडित भएको बताइएको छ ।

नेपाल मानवअधिकार वर्ष पुस्तक २०१९ को लागि अर्धवार्षिक पूर्व समिक्षा कार्यक्रममा उक्त घटनाहरु सार्वजनिक गरिएको हो ।

कार्यक्रममा सरोकारवालाहरुले सार्वजनिक अपराधको परिभाषा बारे प्रष्टयाउन जिकिर गरेका थिए भने जस्तोसुकै अवस्थामा पनि पेल्ने दृष्टिकोणले सार्वजनिक मुद्दा लगाइने गरेकोप्रति खेद प्रकट गरे ।

ईन्सेक धनुषाका प्रतिनीधि विनोद कुमार महराले सँचालन गरेको कार्यक्रममा जिल्ला प्रहरी कार्यालय धनुषाका प्रतिनीधि, विभिन्न राजनीतिक दलका प्रतिनीधि सहित अधिकारकर्मीहरुको सहभागिता रहेको थियो ।