कमला नदीमा निरन्तर कमला आरती हुनुपर्छः उपमेयर सिँह

न्यूज ब्यूरो, जनकपुरधाम । धनुषाको शहिदनगर नगरपालिकाकी उपमेयर सुनिता सिँहले कमला नदीमा निरन्तर कमला आरती भव्य रुपमा हुनुपर्ने बताएकी छन् ।

कार्तिक पूर्णिमाको अवसरमा जनमत पार्टीका युवा नेता विजय यादवको नेतृत्वमा शहिदनगर रामघाटमा आयोजन गरिएको कार्तिक पूर्णिमा महोत्सवको क्रममा बोल्दै उपमेयर सिँहले आगामी बर्षदेखि भव्य रुपमा मेला लगाउनुपर्ने धारणा राखिन् । उनले मधेशको विभन्नि जिल्लाबाट श्रद्धालुहरु आउने गरेकोमा महोत्सवको रुपमा मनाउन स्थानीय सरकारले सहयोग गर्ने प्रतिवद्धता जाहेर गरिन् ।

अभियानी बीरेन्द्र यादवको अध्यक्षतामा शहिदनगर नगरपालिका वडा नम्बर १ को समन्वयमा स्थानीय नवजीवन दिप युवा क्लबको सहयोग तथा रामघाट संरक्षण समितिको आयोजनामा भएको महोत्सव कार्यक्रममा उपमेयर सिँहले यसलाई भव्यता प्रदान गर्नुपर्ने आवश्वकयता औल्याइन् ।

कार्यक्रममा विशिष्ट अतिथिको रुपमा उपस्थित भएका वृहत्तज जनकपुर क्षेत्र विकास परिषदका अध्यक्ष शितल साहले कमला स्नानलाई महोत्सवको रुपमा विकास गर्नुपर्ने बताए । उनले धार्मिक यात्रासँग जोडेर कमलाको बखान जनजनमा जानुपर्र्ने धारणा राखे । उनले महोत्सवको रुपमा मनाउन आग्रह गरे ।

कार्यक्रममा वडा नम्बर १ का प्रतिनीधिहरु, विभिन्न राजनीतिक दलका अगुवाहरु, समाजसेवी, क्लबका सदस्यहरुको सहभागिता रहेको थियो । सो क्रमममा भव्य कमला आरती समेत गरिएको थियो ।