पर्वमा ओरकेष्ट्रा नगराउन धनुषा, रौतहट,सिरहा र सर्लाहीका सिडिओलाई हिन्दु सम्राट सेनाको ज्ञापन

न्यूज ब्यूरो, जनकपुरधाम । हिन्दु सम्राट सेनाले मधेशको विभिन्न जिल्लाका सिडिओलाई ज्ञापन पत्र बुझाएको छ ।

हिन्दु धर्मावलम्बीहरुको पर्व र उत्सवमा अश्लिल प्रकारको ओरकेष्ट्रा नचाएर धर्म सँस्कृति उपर प्रहार हुन थालेको भन्दै यस्ता कार्यक्रम गराउन नदिन प्रशासनलाई आग्रह गरिएको छ ।

मधेश प्रदेशको धनुषा, सिरहा, सर्लाही र रौतहट जिल्लामा हिन्दु सम्राट सेनाले एकै दिन सिडिओलाई ज्ञापन पत्र बुझाएको हो । नाचगानको नाममा अश्लिल कार्यक्रम गर्दा समाजमा समेत नाकारात्मक असर पर्दै गएको भन्दै यस्ता कार्यक्रम नगराउन माग गरेको हो ।

पोष्टरमा साँस्कृतिक कार्यक्रम लेखेर अश्लिल ओरकेष्ट्रा गराउने प्रवृति बढेपछि हिन्दु सम्राट सेनाले प्रशासन गुहारेको हो । यसको साथै, यस्ता कार्यक्रम भए प्रशासनले बन्द नगराए हिन्दु सम्राट सेनाले आफैँ एक्सन लिने चेतावनी समेत दिएको हिन्दु सम्राट सेनाका अध्यक्ष राजेश यादवले बताए ।