हँसपुर नगरपालिकामा डा. वृजमोहन रजकको पाठेघर बचाउ अभियान, २०० बढी महिलाले लिए सेवा

न्यूज ब्यूरो, जनकपुरधाम । धनुषाको हँसपुर नगरपालिकामा महिलाहरुको स्वास्थ्यलाई ध्यानमा राख्दै पाठेघर बचाउ अभियान स्वास्थ्य शिविर गरिएको छ ।

जनकपुरको नैना हस्पिटलका चर्चित डाक्टर वृजमोहन रजकले हँसपुर नगरपालिका वडा नं. ९ रुदौली विद्यालयमा स्वास्थ्य शिविरको आयोजना गरी महिलाहरुको निःशुल्क चेकजाँच गरेको हो ।

वडा नं. ९ का वडाध्यक्ष प्रदीप कुमार मण्डलको विशेष सहयोग तथा नैना हस्पिटल जनकपुर र दिव्या क्लीनिक एण्ड डायग्नोष्टिक सेन्टर जनकपुरको समन्वयमा गरिएको निःशुल्क स्वास्थ्य शिविर र अभियानमा दुई सय बढी महिलाहरुले सेवा लिएकी हुन् ।

शुक्रबार सम्पन्न एक दिने शिविरको लागि डा. रजकको टिमले सो वडामा घर घरमा पुगेर महिलाहरुको स्वास्थ्य अवस्थाबारे जानकारी लिँदै पाठेघरको समस्याको तथ्याँक सँकलन गरेका थिए । तथ्याँकपछि आयोजना गरिएको शिविरमा उनीहरुलाई चेकजाँच गरी उपचार समेत गरिने जनाइएको छ ।

१५० जना बढी महिलाहरुको थाईराइडको स्याम्पल संकलन गरिएको हस्पिटलका उमेश राउतले जानकारी दिए । राउतका अनुसार, स्त्रीरोग विशेषज्ञ (गाइनो) डा. वृजमोहन कुमार रजकले आफैँ चेकजाँच गरेका थिए ।

शिविरबा दुई सय बढी महिला लाभान्वित बनेको जनाइएको छ । वडाध्यक्ष मण्डलले डा. रजकको अभियानलाई बल दिँदै आगामी दिनमा समेत यस्ता शिविर सँचालनको प्रतिवद्धता जाहेर गरे ।