जनकनन्दिनी गाउँपालिकामा लागुऔषध र बालविवाह विरुद्ध सडक नाटक प्रदर्शन

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकामा लागुऔषध, समाजिक विकृति र बालविवाह विरुद्धको सडक नाटक प्रदर्शन गरिएको छ ।

जनकनन्दिनी गाउँपालिकाको आयोजनामा गाउँपालिकाको सबै वडामा लागुऔषध तथा समाजिक विकृतिविरुद्धको सडक नाटक प्रदर्शन गरिएका हो ।

समाजिक सँस्था त्रिनेत्र ट्रेनर्स नेटवर्क प्रा.लि.को समन्वयमा वडा नं. १ देखि ६ सम्मको विभिन्न वस्तीमा लागुऔषध विरुद्धको सडक नाटक प्रदर्शन गरी जनचेतना फैलाएको बताईएको छ ।

वडा नं. १ को मल्हनीयाँ, वडा नं. २ को बल्हा फिल्ड, वडा नं. ३ को महुवा बजार, वडा नं. ४ को मिलनचोक, उच्च मावि खजुरी र मावि खजुरी चन्हामा नाटक गरिएको हो । यस्तै वडा नं. ५ को मावि बनरझुला र वडा नं. ६ को कठालस्थित मन्दिरमा सडक नाटक गरिएको सँस्थाका अभिनय मिश्रले जानकारी दिए ।

गाउँपालिकाको आयोजनामा ६ वटै वडाको ६ ठाउँमा नाटक गरिएको हो भने वडा नं. ४ को आयोजनामा वडाभरिमा तीन विभिन्न वस्तीमा नाटक गरिएको हो ।

नाटकको लागि जनकपुरसहित अन्य विभिन्न ठाउँबाट आएका अनुभवी कलाकारहरुले लागुऔषध तथा समाजिक विकृति विरुद्ध र बालविवाह विरुद्धको सडक नाटक गरेको जनाइएको छ । असार ११ गतेदेखि १४ गतेसम्म गरिएको सडक नाटकबाट जनमानसमा चेतना फैलिएको दाबी गरिएको हो ।