तरुण दल सिरहाको कार्यवाहक अध्यक्ष मण्डल नै हुनः सभापति यादव

न्यूज ब्यूरो, सिरहा । नेपाली काँग्रेसका सिरहा जिल्ला सभापति रामचन्द्र यादवले तरुण दल सिरहाको कार्यवाहक अध्यक्ष अरबिन्द मण्डल नै रहेको प्रष्टयाएका छन् ।

नेपाली काँग्रेसका भातृ सँगठनको रुपमा रहेको नेपाल तरुणको जिल्ला कार्य समिति सिरहामा पटक पटक विवाद हुँदा सभापति यादवले फायर खोलेका छन् । उनले मँगलबार जिल्ला कार्य समिति सिरहाद्धारा एक प्रेस विज्ञप्ति जारी गर्दै अरबिन्द मण्डललाई कार्यवाहक अध्यक्षको जिम्मेवारी रहेको प्रष्टयाएका हुन् ।

यसअघि तरुण दल सिरहाको सभापति दाबी गर्दै आएका सरद राजा शाही जिल्ला कार्य समितिमा निर्वाचित भएपछि भएको पद रिक्तपछि मण्डललाई कार्यवाहकको जिम्मेवारी तोकिएको उनले उल्लेख गरेका छन् ।

यसअघि शाही नै कार्यवाहक अध्यक्ष रहँदै आएकोमा उनले २०७८ सालमा काँग्रेसको जिल्ला अधिवेशनबाट सदस्यमा निर्वाचित भएपछि उनी स्वतः पदबाट हटेको विधानलाई उदृत गरेका छन् । पद रिक्त भएपछि २०७९ फागुन ३० गतेमा भएको बैठकबाट अरबिन्द मण्डललाई कार्यवाहक अध्यक्षको जिम्मेवारी दिइएको र हालसम्म जारी रहेको बताएका छन् ।

नेपाली काँग्रेस सिरहा र तरुण दलमा समेत गुट उपगुट बनेर विवाद चर्किएपछि तरुण दलका केन्द्रीय अध्यक्ष विद्धान गुरुङगले समेत विवाद समाप्त पार्न सूचना जारी गरेका छन् । सरद राजा शाहीमाथि भएको कालोमोसो प्रकरणपछि यथाशिघ्र विवाद मिलाउन विज्ञप्ति जारी गरेका हुन् ।

अध्यक्ष गुरुङग केही दिन अगाडी मात्र सिरहामा भएको एक कार्यक्रममा समेत अरबिन्द मण्डलकै अध्यक्षा स्वीकार गरी कार्यक्रम गरेको बताएपछि अरबिन्द मण्डल नै कार्यवाहक अध्यक्ष रहेको पुष्टयाई भएको छ ।

यता, सभापति यादवले सरद राजा शाहीले काँग्रेसको विधान विपरित गतिविधि र क्रियाकलाप गरेको भन्दै विधान बमोजिम कारवाहीको माग समेत गरेका हुन् ।