धनुषाको लालगढमा चुरे उत्थानशील आयोजनाद्धारा वृक्षारोपण

न्यूज ब्यूरो, जनकपुरधाम । चुरे बचाउ अभियान अन्तर्गत रहेको सरकारको चुरे उत्थानशील आयोजनाले धनुषाको लालगढमा वृक्षारोपण गरेको छ ।

विश्व वातावरण दिवसको अवसरमा आयोजना गरिएको वृहत वृक्षारोपण कार्यक्रमा विभिन्न प्रजातिका विरुवाहरु रोपिएको आयोजनाका लेखा प्रमुख देव कुमार यादवले जानकारी दिए । यादवका अनुसार लालगढको पूर्वपश्चिम राजमार्गभन्दा पूर्व रहेको बञ्जर जमिन जोगाउनको लागि सोही स्थानमा वृहत वृक्षारोपण कार्यक्रम गरिएको हो ।

चुरे उत्थानशील आयोजनाका योजना सँयोजक चुडामणि खतिवडाको अध्यक्षता तथा मधेश प्रदेशका वन मन्त्रालयका सचिव उद्धव बहादुर घिमिरेको प्रमुख आतिथ्यमा वर, पीपल, आँप, कटहर, अम्बा, जामुन, तेजपत्र, कागती, अशोक लगायतका विरुवाहरु रोपण गरिएको हो ।

चुरे उत्थानशील आयोजना प्रदेश आयोजना व्यवस्थापन इकाई बर्दिवास महोत्तरीको आयोजनामा गरिएको सो वृक्षारोपण कार्यक्रममा अधिकारीहरुले विरुवा रोपण मात्र नगरी यसको नियमित हेरचाह गर्नको लागि समेत तत्पर रहन आग्रह गरे ।

वृक्षारोपण गरी हुर्काउनको लागि आयोजनाका कर्मचारीहरुले नियमित रुपमा नीरिक्षण गर्ने, बचाउ गर्ने कार्यमा सँलग्न हुने लेखा प्रमुख यादवले जानकारी दिए ।

सो वृक्षारोपण कार्यक्रममा नेपाल प्रहरी विशेष सुरक्षा गण ढल्केवरका प्रहरी उपरिक्षक नरेन्द्र कुमार कार्की, सामुदायिक वन उपभोक्ता महासंघ मधेश प्रदेशका अध्यक्ष सोमप्रसाद शर्मा, मिथिला नगरपालिका वडा नम्बर ९ का अध्यक्ष दिपकजंग थापा, वडा नम्बर १० का वडाध्यक्ष सविन विक्रम थापा, वन तथा वातावरण मन्त्रालय मधेश प्रदेशका सूचना अधिकार बेचन कुमार महतो, ढल्केवरका युवा नेता सर्वनाथ महतो लगायत आयोजना कार्यालयका कर्मचारी र गणका प्रहरी कर्मचारीहरुले सँयुक्त रुपमा विरुवा रोपण गरेका थिए ।