वडाध्यक्ष निरालालाई भोलीसम्म रिहा गरेन भने पाँच सय बढी जनता गिरफ्तारी दिन्छौँ : सँयोजक भण्डारी

न्यूज ब्यूरो, जनकपुरधाम । धनुषाको शहिदनगर नगरपालिकाको बेतिथि विरुद्ध प्रदर्शनमा गएका सोही नगरपालिकाका निर्वाचित वडाध्यक्ष उमेश कुमार निरालालाई प्रहरीले पक्राउ गरेको भन्दै अविलम्ब रिहाईको माग गरेको छ ।

शहिदनगरको सर्वदलिय संघर्ष समितिले शनिबार ईलाका प्रहरी कार्यालय यदुकूहा मार्फत जिल्ला प्रशासन कार्यालयलाई बुझाएको ज्ञापन पत्रमा विभिन्न माग उल्लेख गर्दै आफूहरु स्वेच्छाले गिरफ्तारी दिन तयार रहेको उल्लेख गरेका छन् ।

गत बैशाख १० गते शहिदनगर नगरपालिकामा भएको प्रदर्शनको क्रममा नगरपालिका कार्यालयभित्रैबाट आएका अराजक व्यक्तिहरुले प्रदर्शनकारीमाथि ढुँगामुढा प्रहार गर्दा सरकारी गाडी समेत तोडफोड भएको बताउँदै प्रदर्शनकारीमाथि झुठा मुद्दा लगाएर फँसाउन खोजिएको जिकिर गरिएको छ ।

शहिदनगरका नगर प्रमुख दिनेश प्रसाद यादवको ज्यादती र अनियमितता विरुद्ध आवाज उठाउँदा आन्दोलनका सँयोजक समेत रहेका शहिदनगर नगरपालिका वडा नम्बर ६ का वडाध्यक्ष उमेश कुमार निरालालाई लाठी प्रहार गरी प्रशासनले झुठा मुद्दा लगाएर बन्दी बनाएको भन्दै अविलम्ब रिहाईको माग गरिएको हो ।

संघर्ष समितिले वडाध्यक्ष निरालाको स सम्मान रिहाई, गैर कानुनी रुपमा शिक्षा सँयोजक नियुक्त गरिएका शिक्षक विश्वनाथ यादवको काज फिर्ता, गत आर्थिक बर्षको भुक्तानीको विवरण, गत आर्थिक बर्षदेखि हालसम्मको नियुक्तिको विवरण, अवैद्य रुपमा हाजिरी रोक्का गरिएका बालविकास शिक्षिकाहरुको पुनः हाजिर गराउनुपर्ने, गैरकानुनी काज सरुवा भएका मावि महुलियका शिक्षक श्रीप्रसाद यादवको काज फिर्ता हुनुपर्ने र मावि महुलियामा अविलम्ब विद्यालय व्यवस्थापन समिति गठनको माग गरिएको हो ।

पूर्वमन्त्री रामचन्द्र झा, पूर्व नगर प्रमुख उदय कुमार बरबरिया यादव, हेम शंकर भण्डारी, राम किशोर पासवान, सुकेश मण्डल, रामचन्द्र मण्डल , भरथ यादव, सुरज मण्डल, विनोद मण्डल, श्याम चौधरी, राम तपेश्वर यादव, हलखोरी कापर, मकेश्वर मण्डल, श्रीनारायण महरा र सिन्देश्वर माझीले यसको लागि स्वेच्छाले गिरफ्तारी दिन तयार रहेको प्रतिवद्धता दिएको हो ।

संघर्ष समितिका सँयोजक हेमशँकर भण्डारीले भोली वडाध्यक्षमाथिको झुठा मुद्दा फिर्ता नलिए, रिहाई नगरे पाँच सय बढी जनतासहित स्वेच्छाले गिरफ्तारी दिने जनाएको हो ।