काँग्रेस कोटामा प्रदेश प्रमुख बनेका मधेश प्रदेशका हरिशँकर मिश्रलाई हटाउने तयारी

न्यूज ब्यूरो, जनकपुरधाम । नयाँ मन्त्रिमण्डल विस्तारपछि काँग्रेसको कोटाबाट प्रदेश प्रमुख बनेका मधेश प्रदेशका प्रदेश प्रमुख (गर्वनर) हरिशँकर मिश्रलाई हटाउने तयारी गरिएको छ ।

केन्द्रमा नयाँ सत्ता समिकरणमा फेरबदल भएपछि प्रतिपक्षमा गएका काँग्रेस पार्टीबाट प्रदेश प्रमुख बनेका मधेश प्रदेशका प्रदेश प्रमुख मिश्रलाई हटाउने तयारी गरिएको हो ।

मिश्रसहित सरकारले गण्डकी र सुदूरपश्चिम प्रदेशका प्रदेश प्रमुखलाई समेत पदमुक्त गर्ने निर्णय गरेको हो ।

यसअघि कांग्रेस–माओवादी गठबन्धन हुँदा कांग्रेसको कोटामा नियुक्त भएका प्रदेश प्रमुखलाई सोमबार बसेको मन्त्रिपरिषद बैठकले पदमुक्त गर्ने निर्णय गरेको हो ।

गण्डकीमा पृथ्वीमान सिंह गुरुङ, मधेशमा हरिशंकर मिश्र र सुदूरपश्चिममा देवराज जोशी प्रदेश प्रमुख थिए ।

ती प्रदेशमा नयाँ प्रदेश प्रमुख पनि सिफारिस गरेको छ । जस अनुसार मधेशमा सुमित्रा भण्डारी, गण्डकीमा डिल्लीराज भट्ट र सुदूरपश्चिममा नजिर मियाँ सिफारिस भएका सरकारकी प्रवक्ता सञ्चार तथा सूचना प्रविधिमन्त्री रेखा शर्माले जानकारी दिइन् ।