शहिदनगरका तत्कालिन कान्छो मेयर बरबरिया, अधिकृत महतोसहित सबै बेकसुर ठहर, सबैले पाए सफाई

न्यूज ब्यूरो, जनकपुरधाम । धनुषाको शहिदनगर नगरपालिकाका तत्कालिन मेयर (कान्छो मेयर) उदय कुमार बरबरिया (यादव) सहित मुद्दा लागेका सबै जनाले सफाई पाई बेकसुर साबित भएका छन् ।

तत्कालिन मेयरसहित, तत्कालिन उपमेयर, तत्कालिन प्रमुख प्रशासकीय अधिकृत, लेखा, इन्जिनीयर, उपभोक्ता समिति सबैले सफाई पाएका हुन् ।

सडक निर्माणमा भ्रष्टाचार गरेको दावीसहित अख्तियार दुरुपयोग अनुसन्धान आयोगले तत्कालीन मेयर बरबरिया, उपमेयर कापरी, तत्कालीन प्रमुख प्रशासकीय अधिकृत रामकिशोर महतोसहित १२ जनामाथि २३ माघ २०७९ मा विशेष अदालतमा मुद्दा दायर गरेको थियो ।

सो मुद्दामा विशेष अदालतका अध्यक्ष टेकनारायाण कुँवर, रामबहादुर थापा र रितेन्द्र थापाको संयुक्त इजलासले बुधबार अन्तिम फैसला सुनाउँदै सबैलाई सफाइ दिएको अदालतले जनाएको छ ।

शहीदनगर नगरपालिका वडा नम्बर ८ बिसरभोरा नहरदेखि गोठ कोयलपुरसम्म कृषि सडक निर्माणका क्रममा फिल्डमा भएको कामभन्दा बढी काम भएको भनेर कार्यसम्पन्न प्रतिवेदन तयार पारी उपभोक्ता समितिलाई बढी भुक्तानी गरेको भन्दै अख्तियारले सोही दाबीसहित १२ जना उपर भ्रष्टाचारको मुद्दा दायर गरेको थियो ।

अख्तियारले इन्जिनियर सञ्जय यादव, वडा नम्बर ८ का वडाध्यक्ष तनुकलाल कुसियत, योजना शाखा प्रमुख विन्देश्वर यादव, तत्कालीन लेखा अधिकृत नन्दकुमार झा, उपभोक्ता समितिका अध्यक्ष कारी चमार, कोषाध्यक्ष रेखाकुमारी, सचिव मुकेश लखनदे यादव, लेखा समितिका संयोजक जैसिलाल भिनवार यादव र सुशासन समितिका संयोजक कन्हैया मुखियालाई पनि भ्रष्टाचार मुद्दा लगाएको थियो ।

बुधबार विशेष अदालतको ईजलासले मुद्दा दायर गरिएका १२ जनालाई सफाई दिएको हो । सरकारी कर्मचारीहरुमा कुशल अधिकृत मानिएका रामकिशोर महतो, कर्मचारी नन्द कुमार झा, इन्जिनीयर सँजय यादव लगायत निर्दोष साबित भएका हुन् ।