मृतक आरती साहका श्रीमान मोतीबाबु जनकपुरबाट पक्राउ, धर्ना बसेका परिवारलाई थप राहत

न्यूज ब्यूरो, जनकपुरधाम। आरती साह मृत्यु प्रकरणमा विगत १८ दिनदेखि फरार रहेका उनका श्रीमान मोतीबाबु साहलाई प्रहरीले पक्राउ गरेको छ ।

जिल्ला प्रहरी कार्यालय धनुषाबाट खटेको प्रहरी टोलीले साहलाई सोमबार बिहान जनकपुरधामाको सिताचोकस्थित होटल सगुनबाट पक्राउ गरेको हो ।

सर्वोच्च अदालतले आरती साह मृत्यु प्रकरणमा उनका श्रीमान् मोतीबाबुलाई गत मंसिर २० गते थुनामा पठाउन आदेश दिएको थियो ।

न्यायाधीश नहकुल सुवेदी र तिलप्रसाद श्रेष्ठको इजलासले साहलाई थुनामा पठाउने आदेश दिएसँगै उनी फरार भएका थिए ।

यस्तै आरती साहका ससुरासँग १ लाख रूपैयाँ धरौटी माग गरिएको थियो । यसअघि उच्च अदालत जनकपुरले आरती साहका ससुरा र श्रीमानलाई धरौटीमा रिहा गर्ने आदेश दिएको थियो । उनीहरू दुवै जना थुनाबाहिर थिए ।

यता, आरती साहको परिवार न्यायको माग गर्दै माइतीघर मण्डलामा १९४ दिनदेखि धर्नामा बसेको छ ।