जनकपुरको सिद्धार्थ शिशु सदनको ४३ औँ वार्षिकोत्सव, रक्तदानदेखि विज्ञान प्रदर्शनीसम्म

न्यूज ब्यूरो, जनकपुरधाम । जनकपुरधामको पुरानो नीजि विद्यालय मानिएको सिद्धार्थ शिशु सदन माध्यमिक विद्यालयले ४३ औँ वार्षिकोत्सवमा तीन दिवसीय कार्यक्रम गर्ने भएको छ ।

प्रत्येक बर्ष वार्षिकोत्सवको अवसर पारेर विभिन्न कार्यक्रम गर्दै आएको विद्यालयले यसपाली पनि तीनदिवसीय कार्यक्रम गर्ने भएको छ ।

प्रत्येक बर्ष पुस ५ गतेदेखि मनाउने वार्षिकोत्सवको अवसरमा अभिभावक, विद्यार्थीलाई प्रोत्साहन, अतिरिक्त क्रियाकलाप, समाजिक कार्य, मानव सेवा, धर्मकर्मका कार्यहरु गर्दै आएको सिद्धार्थ स्कूलले यसपाली पनि कार्यक्रमहरुलाई निरन्तरता दिएको प्रिन्सीपल राजु यादवले बताए ।

जस अनुसार, भोली विहिबार पुस ५ गते प्रथम दिन पाँच वटा कार्यक्रम राखिएको छ । विहान ८ बजेदेखि ११ बजेसम्म रक्तदान कार्यक्रम, १० बजेदेखि २ बजेसम्म विज्ञान प्रदर्शनी, सोही समयमा चित्रकला प्रदर्शनी, क्राफ्ट प्रदर्शनी र कम्प्यूटर प्रविधि प्रदर्शनी कार्यक्रम राखिएको छ ।

यस्तै शुक्रबार पुस ६ गते विहान ८ बजेदेखि २ बजेसम्म खाद्यान्न मेला र सोही दिन जानकी वृद्धाश्रम र कबिर बाल अनाथ आश्रममा सहयोगको कार्यक्रम रहेको छ ।

अन्तिम दिन शनिबार मानव सेवा आश्रम जनकपुरमा सहयोग गर्ने कार्यक्रम रहेको प्रिन्सीपल यादवले जानकारी दिए ।

प्रिन्सीपल यादवले विद्यालयको तर्फबाट रक्तदानमा अभिभावकहरुलाई समेत सहभागी हुन आग्रह गरेका छन् भने विज्ञान प्रदर्शनीको लागि वा अन्य क्रियाकलापको लागि विद्यालयको पोशाक अनिवार्य गरिएको बताए ।