जनमत पार्टीमा अधिवेशनको जिम्मेवारी पुरा नगर्नेहरु उम्मेदवार हुन नपाउने

न्यूज ब्यूरो, जनकपुरधाम । जनमत पार्टीले पार्टीको अधिवेशनमा तोकिएको जिम्मेवारी पुरा नगर्ने नेता(कार्यकर्तालाई कुनै पनि तहको निर्वाचनमा उम्मेदवार हुन नदिने निर्णय गरेको छ।

मंसिर १५ गतेदेखि जनमत पार्टीको वडादेखि प्रदेश समितिसम्मको अधिवेशन सुरु भएको हो।

पार्टीका सचिव बीपी साहले भने –“पार्टीको वडा अधिवेशनमा पार्टी निर्देशिका अनुसार तोकिएको जिम्मेवारी पुरा नगर्ने नेता–कार्यकर्ताहरु पार्टीको कुनै पनि तहको अधिवेशनमा उम्मेदवार हुन पाउने छैनन्। उहाँहरू कुनै तहको आम निर्वाचनमा पनि उम्मेदवार हुन अयोग्य हुन सक्ने निर्णय पार्टी सचिवालयले गरेको छ।”

जनमतले मंसिर १५ गतेदेखि माघ १५ गतेसम्म वडा अधिवेशनको समय तोकेको छ । माघ १५ देखि फागुन १५ गतेसम्म पालिका अधिवेशन र चैत्र ३ गते एकै साथ जिल्ला अधिवेशनको घोषणा गरिएको उनले जानकारी दिए ।

२०८१ बैशाख २४ गतेदेखि ३० गतेसम्म प्रदेश अधिवेशनको कार्यक्रम रहेको सचिव साहले बताए ।