काँग्रेसको महासमिति सदस्यमा जनकपुरका जीवनाथ चौधरी निर्वाचित

न्यूज ब्यूरो, जनकपुरधाम । धनुषा निर्वाचन क्षेत्र नम्बर ३ मा केन्द्रीय महासमिति सदस्यमा जनकपुरका जीवनाथ चौधरी निर्वाचित भएका छन् ।

जनकपुरका चर्चित होटल व्यावसायी समेत रहेका चौधरी नेपाली काँग्रेसको महासमिति सदस्यमा निर्वाचित हुन सफल भएका छन् । चौधरीसँगै जनकपुरधाम उप–महानगरपालिकाका उप–प्रमुख किशोरी साह समेत निर्वाचित भएका छन् ।

शुक्रबार भएको निर्वाचनमा किशोरी साहले ३ सय ७९ र जीवनाथ चौधरीले ३ सय १८ मत ल्याइ विजयी भएका छन् । अर्का उम्मेदवार शिवचन्द्र चौधरीले ३ सय २ र रामबाबु यादवले २ सय ८९ मत ल्याएका छन् ।

धनुषा निर्वाचन क्षेत्र नम्वर ३ मा नेपाली कांग्रेसका पूर्व उप–सभापति विमलेन्द्र निधि र अर्का नेता रामसरोज यादवले मधेशी कोटाको सदस्यका लागि आ–आफ्ना अडानमा अडिग भएपछि पहिलो पटक महासमिति सदस्यका लागि निर्वाचन भएको छ ।

नेता निधि र नेता यादवबीच मधेश प्रदेश समितिका सदस्य जीवनाथ चौधरीलाई लिएर ठूलै चर्काचर्कीका साथै निर्वाचन सम्मको परि स्थिति आएको थियो ।

कुल खसेको ६ सय ३५ मध्ये चौधरीले ३ सय १८ मत प्राप्त गरे । नेता निधिले आफ्नो पक्षबाट किशोरी साह र शिवचन्द्र चौधरीलाई उम्मेदवार बनाएका थिए भने नेता यादवको पक्षबाट जीवनाथ चौधरी र रामबाबु यादव उम्मेदवार थिए । तर, दुवै पक्षबाट एकएक जना विजयी भएपछि दुबै जनाको प्रतिष्ठा भने जोगिएको छ ।

धनुषा निर्वाचन क्षेत्र नम्बर ३ बाट काँग्रेसका महासमिति सदस्यको लागि स्मृति नारायण चौघरी, गणेश तिवारी, अनामिका निधि, राम सरोज यादव, प्रमिला दास, मिनाक्षी झा
,निलम कर्ण , प्रफुल्ल घिमिरे, संजय कुमार गुप्ता, मधेशी तर्फ कोटामा किशोरी साह र जीवनाथ चौधरी सदस्यमा निर्वाचित भएका हुन् ।