पर्सी शुक्रबार जनकपुरको रेल्वे स्टेशनमा एकसाथ ५०० बढी युवतिले झिझिया खेल्ने

न्यूज ब्यूरो, जनकपुरधाम । जनकपुरधामको धार्मिक इतिहासमा पहिलो पटक जनकपुरका युवतिहरुले एक साथ अधिक सँख्यामा झिझिया खेल्ने भएको छ ।

नव मिथिला फाउण्डेशनको आयोजनामा पर्सी शुक्रबार झिझिया महोत्सवमा एकसाथ पाँच सय बढी युवतिहरुले झिझिया खेल्ने आयोजकले जनाएको छ ।

मिथिलाको लोक संस्कृति, लोक गायन र धार्मिक परम्परालाई पछ्याउँदै झिझिया आयोजना गर्न लागेको फाउन्डेसनका उपाध्यक्ष आदित्य नेपालले बताए ।

उनका अनुसार, पहिलोपटक पाँच सय जना टाउकोमा झिझिया घैंटा राखेर नाच्ने छन् । जसमा केही झिझिया टीम र जनकपुरका कलेजका छात्राहरु एकै लयमा झिझिया नाच्ने उनले बताए ।

जनकपुरस्थित रेल्वे स्टेशनको प्राङग्रणमा हुने महोत्सवमा सुरुमा वक्ताहरूले लोप हुँदै गइरहेको झिझियाको विगत, वर्तमान र भविष्यबारे चर्चापरिचर्चा गर्ने फाउन्डेसनका अध्यक्ष साहले बताए । उनका अनुसार कार्यक्रममा स्थानीय लोक गायकहरू सहभागी हुनेछन् ।

समयक्रमअनुसार विस्तारै लोप हुँदै गइरहेको यी संस्कृति र संस्कारको जगेर्ना गर्नु कर्तव्यसँगै दायित्व पनि बनेकाले आयोजना गर्न लागेको आयोजकले जनाएको छ ।

फाउन्डेसनले विगत पाँच वर्षदेखि जनकपुर साहित्य महोत्सव आयोजना गर्दै आएको छ । यस वर्षदेखि ‘जनकपुर झिझिया महोत्सव’आयोजन गर्न लागेको हो ।