झिझिया खेल्ने क्रममा युवकको पेट दुखेपछि मूर्ति बनाउने परिवारमाथि बोक्सी भन्दै कुटपिट, तीन घाईते

न्यूज ब्यूरो, जनकपुरधाम । दशैँमा तराई मधेशमा खेलिने झिझियाको क्रममा एक युवकलाई पेट दुखेपछि मूर्ति बनाउने परिवारमाथि सामुहिक कुटपिट गरिएको छ ।

पूर्वी धनुषाको कमला नगरपालिका वडा नं. २ सराबे टोल (साबिक माचि झिटकैया वडा नं.८) स्थित बनाईएको दुर्गाको प्रतीमास्थित झिझिया खेल्ने क्रममा एक युवकलाई पेट दुखेपछि मूर्ति बनाउने परिवारमाथि बोक्सीको आरोप लगाउँदै सामुहिक कुटपिट गरिएको हो ।

सराबे चौकस्थित स्थानीय रामबाबु मण्डलले भाकल अनुसार दुर्गाको प्रतिमा निर्माण गरेका छन् । दशैँ चढेलगत्तै सो गाउँका किशोरी, युवति, महिलाहरुले झिझिया खेल्न आउने क्रममा सोही स्थान बस्ने स्थानीय जिवचन मण्डलका १७ बर्षिय छोरा रितिक मण्डल समेत झिझिया खेलेका थिए । झिझिया केही बरे खेलेपछि उनको अचानक पेट दुखेको प्रत्यदर्शीहरुले जनाएको छ ।

पेट दुख्न थालेपछि उनलाई अस्पताल लग्नुको साटो धामी झाँक्री बोलाएर ठिक गर्न लगाएका थिए । उनलाई पानी खुवाएपछि र टाउकोमा पानी हालेपछि तत्कालै उनी निको भए तर, रितिकका आमाबुवा र आफन्तहरुले बोक्सीको सँज्ञा दिँदै मूर्ति बनाएका रामबाबु मण्डलको घर परिवारमाथि एकाबिहानै कुटपिट गरेको हो ।

नातीको पेट दुखेपछि आक्रोसित जिवचन मण्डलका घर परिवारलाई सोही ठाउँका केही अन्य समुदायका व्यक्तिहरुले कान फुकेपछि मारपिटमा उत्रेको बताईएको छ । रामबाबु मण्डलको घरमा आएका पाहुनाहरुलाई जिवचन, उनका छोरा र उनकी श्रीमति मिलेर कुटपिट गरेपछि दुई तर्फा झडप भएको थियो । घर पसेर कुटपिट गर्न थालेपछि रामबाबु मण्डलको परिवारले प्रतिकार गर्दा तीन जना घाईते भएको हो ।

झगडाको क्रममा रामबाबु मण्डललाई टाउकोमा बाँसको भाटा प्रहार गरिएको छ भने उनकै तर्फबाट शँकर मण्डललाई समेत चोट लागेको हो । झगडाको क्रममा जिवचन मण्डल पनि घाईते भएका छन् । उनलाई टाउकोमा गम्भिर चोट लागेको छ । उनको टाउकोमा पाँचवटा टाँका लगाईएको छ । ६५ बर्षिय जिवचन रितिकका हजुरवुवा हुन् । सोही क्रममा जिवचनकै तर्फबाट उनका छोरा कमलेश मण्डललाई नाकमा गम्भिर चोट लागेको हो । उनको नाकबाट अझै रगत नरोकिएको बताईएको छ ।

मूति बनाएका रामबाबु मण्डलको परिवार नै आफ्नो नातीलाई बोक्सी गरिदिएको भन्दै जिवचन मण्डलको परिवारले उनीहरुलाई कुटपिट गरेको बताईएको छ । यता, जिवचन पक्षले रामबाबु मण्डलका घर परिवारले नै आफूहरुलाई कुटेको दाबी गर्छन् । तर, गाउँलेहरुले भने जिवचन घर पसेर झगडा गरेपछि दुईतर्फा झडप भएको बताएको हो ।

रामबाबु मण्डल र जिवचन मण्डल दुवै दियाद हुन् । झिझिया खेल्ने क्रममा भएको विवादलाई लिएर दुईतर्फा झगडा भएपछि दुवै तर्फबाट मानिसहरु घाईते भएका छन् । यस सन्दर्भमा प्रहरीले अनुसन्धान सुरु गरेको बताईएको छ ।