धनुषामा पनि खुल्यो जग्गाको कित्ताकाट, अंशबण्डाको लागि न्यूनत्तम यति जग्गा अनिवार्य

न्यूज ब्यूरो, जनकपुरधाम । सरकारले निर्णय गरेपछि बन्द भएको जग्गा जमिनको कित्ताकाट धनुषामा पनि खुलेको छ । केही जिल्लाहरुमा यसअघि नै खुल्ला गरिएपनि धनुषामा विहिबारदेखि कित्ताकाट खुलेको हो ।

भूउपयोग नियमावली २०७९ र भूउपयोग नियमावली (पहिलो संशोधन) २०८० बमोजिम विभिन्न क्षेत्रलाई मापदण्डभित्र राखी जग्गा जमिनको कित्ताकाट सुरु गरिएको हो ।

जसको लागि यदि कृषि खेती क्षेत्रको जग्गाको कित्ताकाटको लागि कम्तीमा ६७५ वर्गमिटर हुनुपर्ने नियम लागू हुनेछ । यस्तै, घर बनाउन वा व्यावसायिक क्षेत्रको लागि कित्ताकाट गर्नुपरेमा कम्तीमा १३० वर्गमिटरको क्षेत्रफल अनिवार्य हुनुपर्ने नियम लागू हुनेछ ।

यस्तै, स्थानीय तहले निर्धारण गर्ने गरी सडक बाटोमा पर्ने जग्गा जमिनको कित्ताकाट गर्न कम्तीमा ८० बर्गमिटर क्षेत्रफल अनिवार्य भए मात्र कित्ताकाट हुने जनाईएको छ ।

भूमि व्यवस्था कृषि तथा गरिबी निवारण मन्त्रालय अन्तर्गतको नापी विभाग अन्तर्गत पर्ने नापी कार्यालय धनुषा जनकपुरले विहिबार एक सूचना जारी गर्दै जग्गा जमिनको कित्ताकाट सुरु भएको जानकारी दिएको हो ।

यसका साथै, अंशवण्डा, अंश भर्पाई, मोही र जग्गाधनीबीच जग्गाको बाँडफाँड र वर्गिकरण नभएको क्षेत्रमा नियमावली बमोजिम कित्ताकाट हुने जनाएको छ ।