कमला युवा सँजालले मनाए २४ औँ अन्तराष्ट्रिय युवा दिवस

न्यूज ब्यूरो, जनकपुरधाम । विश्वभर अन्तर्राष्ट्रिय युवा दिवस मनाउनको क्रममा धनुषाको कमला नगरपालिकामा समेत युवा दिवस मनाईएको छ । कमला युवा सँजाल नामक क्लबले कमला नगरपालिका वडा नं. ४ साघारा चोकमा युवा दिवस मनाएको हो ।

सरकारले बर्षेनि विभिन्न कार्यक्रम गरी युवा दिवस मनाउने गरे पनि युवाका मुद्दा कार्यान्वयनमा भने जहिल्यै समस्या देखिने गुनासो युवाहरुले गरेका छन् ।

कमला युवा सँजालका अध्यक्ष विमलेश यादवको अगुवाईमा सघाराचोकमा शनिबार साँझ दिप प्रज्वलन गरी २४ औ युवा दिवस मनाईएको हो । युवा लक्षित गरी ल्याइएका विभिन्न कार्यक्रम कार्यान्वयन प्रभावकारी नहुँदा युवाका मुद्दा अपेक्षाकृतरुपमा सम्बोधन हुन नसकेको गुनासो युवाहरुले सो कार्यक्रममै पोखेका छन् ।

सरकारले युवा विकास तथा परिचालनका लागि २०६५ सालमा युवा तथा खेलकुद मन्त्रालय गठन गरेको थियो । यस्तै पहिलो पटक युवाको नेतृत्व तथा क्षमता विकास, उद्यमशीलताको विकास र स्वरोजगार, युवाको पहुँच र सहभागिताको सुनिश्चिततासँगै समृद्ध राष्ट्र निर्माण गर्ने उद्देश्यसहित २०७२ साल फागुनमा राष्ट्रिय युवा परिषद् गठन गरिएको थियो । युवालाई स्वरोजगार बनाउनका लागि ‘युवा स्वरोजगार कोष’ पनि स्थापना गरिएको छ ।

साथै राष्ट्रिय युवा नीति २०७२ र यूथ भिजन २०२५ ले पनि युवा विकासका व्यापक विषयलाई नीतिगत रूपमा समावेश गरेको छ । यस्तै प्रदेश, जिल्ला र स्थानीय तहमा पनि युवाका संरचना तयार गरिएका छन् ।

सो कार्यक्रममा कमला युवा सँजालमा महासचिव चन्द्रदीप यादवसहित सँजालमा पदाधिकारी, सदस्यहरुसहित स्थानीयहरुको समेत सहभागीता रहेको थियो ।