तरकारीबारी हटाएर ऐतिहासिक जानकी फूलबारीमा रोपियो १०१ फूल

न्यूज ब्यूरो, जनकपुरधाम । विश्वप्रसिद्ध जानकी मन्दिर परिसरमा रहेको ऐतिहासिक जानकी फूलबारीमा १०१ वटा फूलको बोट रोपण गरिएको छ ।

धार्मिक ईतिहास बोकेको जानकी फूलबारीमा तरकारी बारी लगाएपछि जनकपुरका युवा अगुवाहरुले तरकारीबारी नष्ट गरेका थिए । दुई दिन अगाडी मात्र तरकारी बारी नष्ट गरी जानकी फूलबारीलाई सफा गरेपछि विहिबार जनकपुरियन लेडिज ग्रुपले १०१ फूलको विरुवा रोपण गरेकी हुन् ।

जानकी फूलबारीको लागि दर्जन बढी प्रजातीको विभिन्न सुगन्धित फूलहरु रोपिएको हो । जनकपुरियन लेडिज ग्रुपको पहलमा बिहीबार बिहान जानकी मन्दिरको फूलबारीमा विभिन्न प्रजातिका १०१ वटा फूलको विरुवा रोपिएको जानकी मन्दिरका उत्तराधिकारी महन्थ रामरोशन दास वैष्णवले बताए ।

जानकी फूलबारीमा बेलपत्र, चन्दन, धुपी, रबर प्लान्ट, सम्मीलगायत विरुवा समेत रापिएको लेडिजग्रुपकी सदस्य भारती चौधरीले बताईन् । केही दिनअघि मात्रै धनुषाका प्रमुख जिल्ला अधिकारी (सिडिओ) काशिराज दाहालसहित अभियानीहरुले फूलबारी क्षेत्रमा गरिएको तरकारी खेत नष्ट गरी फूल रोप्न आह्वान गरेका थिए ।

विरुवाहरू मधेश प्रदेश वन डिभिजन कार्यालयका अधिकृत सुरेश शर्माले उपलब्ध गराइदिएका थिए । फूल रोप्ने कार्यक्रममा जानकी मन्दिरका सहायक महन्थ रोशन दास, अभियानी युवा, सुरक्षाकर्मीलगायतले पनि सहभागिता जनाएका थिए ।

जानकी मन्दिरको फूलबारी क्षेत्रमा तरकारी खेती गरिएको पाइएपछि सर्वसाधारणले मन्दिरका महन्थको आलोचना गरेका थिए ।