शहिदनगरमा कार्यकारी वडाध्यक्षको छोरा चलाउँछन् वडा कार्यालय

न्यूज ब्यूरो, जनकपुरधाम । धनुषा शहिदनगर नगरपालिका वडा नं. ८ मा कार्यकारी वडाध्यक्षको जिम्मेवारी सम्हालेकी कायममुकाम वडाध्यको छोराले वडा कार्यालय चलाउँदै आएको छ ।

शहिदनगर नगरपालिका वडा नं. ८ का तत्कालिन वडाध्यक्ष तनुकलाल कुसियैत भ्रष्टाचार मुद्धामा पदमुक्त भएपछि कार्यकारी वडाध्यक्षको जिम्मेवारी वडा सदस्य कला देवी दासलाई दिइएकोमा उनका छोराले सो कार्यालय चलाउँदै आएको छ ।

वडाध्यक्षको कुर्शीमा कार्यकारी वडाध्यक्षलाई बस्नुपर्नेमा उनको छोरा दिनभरि बसेर वडा कार्यालय चलाउँदै आएकोप्रति वडावासीले आपत्ति जनाएको छ । शहिदनगर नगरपालिका वडा नंं ८ की कार्यकारी वडाध्यक्ष कला देवी दास कहिल्यै वडा कार्यालय आउँदैनन्, उनको साटो उनका छोराले वडा चलाउँदै आएको छ ।

आमाको साटो उनका छोरा सँतोष दासले वडाध्यक्षको कुर्शीमा बसेर मुचुल्का, सिफारिस लगायतको विषयमा सेटिँग मिलाउँदै आएका छन् । सो सन्दर्भमा शहिदनगर नगरपालिकाका मेयर दिनेश प्रसाद यादवसँग तोगेदा गर्दा उनले वडाको जिम्मेवारी आफ्नो नरहेको प्रतिक्रिया दिए ।