मानव तस्करी रोक्न समाज चनाखो हुनुपर्छः मेयर यादव

न्यूज ब्यूरो, जनकपुरधाम । धनुषाको कमला नगरपालिकाका मेयर विशेश्वर प्रसाद यादवले मानव तस्करी रोक्नको लागि समाज चनाखो हुनुपर्ने बताएका छन् ।

आईतबार कमला नगरपालिका वडा नं. २ माचि झिटकैयाको लक्ष्मी मन्दिर प्राँगनमा आयोजना गरिएको मानव तस्करी विरुद्धको सडक नाटकपछि सम्बोधन गर्दै मेयर यादवले मानव तस्करीको सँजाल फैलिदै गएको भन्दै गाउँस्तरमा यसप्रति चनाखो हुन आग्रह गरे । उनले विभिन्न प्रलोभनमा पारी भारतमा लगेर छोरी बेचिदिने, छोरा बेचिदिने घटनालाई विस्तृतमा सम्झाए ।

विभिन्न सँघसँस्थाबाट छु भनी रकमको प्रलोभन पारेर अर्को देशमा लगि बेच्ने घटनाहरु बारम्बार भईरहेको भन्दै मेयर यादवले कुनै व्यक्तिमाथि शंका लागेमा तुरुन्त प्रहरीलाई खवर गर्न आग्रह गरे । उनले मानव तस्करीको घटनाहरु बढी गरिबी, अनपढ र रकमको प्रलोभनमा परी हुने गरेको चेताए ।

माईती नेपालको आयोजनामा गरिएको सडक नाटकको क्रममा प्रहरी चौकी माचि झिटकैयाले समुदायिक प्रहरी साँझेदारी कार्यक्रम अन्तर्गत मानव तस्करीको सँजाललाई ब्रेक गर्न समुदायको सहयोगको अपेक्षा गरे । सो क्रममा कमला युवा सँजालका पदाधिकारीहरुले समेत नाटक मँचन गरेका थिए ।

कमला युवा सँजालका अध्यक्ष विमलेश यादव, सचिव चन्द्रदिप यादव, वडा नं. २ का वडा सदस्य जीतनारायण यादव लगायतका व्यक्तिहरुले समेत सम्बोधन गरेका थिए ।

माईती नेपाल धनुषाका कार्यक्रम सँयोजक पुरुषोत्तम यादवको अध्यक्षता तथा नगर प्रमुख विशेश्वर प्रसाद यादवको प्रमुख आतिथ्यमा एक औपचारिक मन्तव्यको सेसन राखेर मानव तस्करी विरुद्ध एकजुट हुन आग्रह गरेका थिए । माईती नेपाल धनुषाका सँयोजक यादवले नाटक मँचन गराएका थिए । नाटकको लागि सयौँ स्थानीयहरुले उपस्थिति जनाएका थिए ।