शहिदनगर वडा नं. ८ निलम्बित वडाध्यक्ष कुसियैत पार्टीबाट निष्कासित

न्यूज ब्यूरो, जनकपुरधाम । धनुषाको शहिदनगर नगरपालिकाका एक निलम्बित वडाध्यक्ष पार्टीबाट पनि निकालिएका छन् । शहिदनगर नगरपालिका वडा नं. ८ बाट निर्वाचित (हाल निलम्बित) वडाध्यक्ष तनुकलाल कुसियैत यादवलाई नेकपा माओवादी केन्द्र पार्टीले निष्कासन गरेको हो ।

नेपाल कम्यूनिष्ट पार्टी माओवादी (केन्द्र) को शहिदनगर नगरपालिका नगर कमिटीले पार्टीको भावना विपरित कार्यहरु गरेको भन्दै उनलाई पार्टीबाट निकालिदिएको हो । उनलाई गत १५ गतेको निर्णय अनुसार निष्कासन गरिएको नगर समितिका सचिव रामकिशोर पासवानले जानकारी दिए ।

नगर समितिले एक प्रेस विज्ञप्ति जारी गर्दै उनलाई पार्टीको साधारण सदस्य समेत नरहने गरी पार्टीबाट निष्कासन गरिएको उल्लेख गरिएको छ । नगर समितिका वरिष्ठ उपाध्यक्ष सुरेश कापरका अनुसार उनले पार्टीको आचरण विपरित, अहितका कार्यहरु गरिरहेको, अप्रत्यासित गतिविधिमा सँलग्न भएको कारण निष्कासन गरिएको हो ।