अनशनरत नेता शर्माको स्वास्थ्य बिग्रिएपछि अस्पताल भर्ना

न्यूज ब्यूरो, काठमाडौँ। नागरिकता बिहिनहरुको लागि न्याय माग्दै ४ दिनदेखि आमरण अनशनमा बसेका नेता राम कुमार शर्माको स्वास्थ्य अवस्था कमजोर बन्दै गएपछि अस्पताल लगिएको छ ।

नेकपा माओवादी केन्द्रका नेता राम कुमार शर्माको स्वास्थ्यमा समस्या आएपछि सोमबार राति वीर हस्पिटलमा भर्ना गरिएको हो । र नेता शर्माले अस्पतालमा पनि आमरण अनशन जारी राख्ने बताइएको छ ।

नागरिकताविहीन लाखौं नेपालीहरूको नागरिकता प्राप्तिका लागि उनले सत्याग्रहको सुरुवात असार १ गते देखि गरेका हुन् । सर्वोच्च अदालतबाट नागरिकता विधेयक सम्बन्धी आदेश नआउँदा लाखौ नेपाली युवा बिचल्लीमा परेकाले अविलम्ब नागरिकता प्रदान गर्ने फैसला आउनुपर्ने माग गर्दै नेता शर्मा गत शुक्रबार दिउँसोदेखि काठमाडौंको माइतीघर मण्डलामा सत्याग्रहमा बसेका छन् ।

नेपालको संविधान २०७२ जारी भएको करिब ८ वर्ष भइसकेको र संविधान जारी भएको मितिले ३ वर्ष भित्र संघीय संसदबाट कानुन बनाएर पूर्णरूपमा कार्यान्वयन गरिने भनिए पनि राज्यद्वारा अनागरिक बनाउने प्रपञ्च सह्य नहुने उनले बताए । नागरिकता विधेयक संघीय संसदबाट पारित भएर राजपत्रमा प्रकाशित भइसक्दासमेत अनेक बहानामा कार्यान्वयन गर्न षड्यन्त्र हुँदै आइरहेको उनको आरोप छ ।