सिरहाका मेयर यादवको समूहले अस्पतालको ईमरजेन्सीमा पसेर डाक्टर कुटे

न्यूज ब्यूरो, सिरहा । सिरहा जिल्लाको सिरहा नगरपालिकाका मेयर नविन कुमार यादवको समूहले चिकित्कसमाथि कुटपिट गरेका छन् ।

शुक्रबार एक विरामी उपचाररत रहेको बेला सिरहाका मेयर यादवसहित उनका समूहले अस्पतालभित्रको आकस्मिक (इमरजेन्सी) सेवामा पसेर चिकित्सक तथा अस्पताल कर्मचारीमाथि हातपात गरेका हुन् ।

सिरहास्थित सिरहा प्रादेशिक अस्पताल सिरहामा शुक्रबार राती ८ बजेको समयमा मेयर यादवको समूह पसेर कर्मचारीमाथ हातपात गरेको आरोप लगाउँदै अस्पताल प्रशासनले आपत्ति जनाएको छ ।

आरटिएका विरामी सिरहा नगरपालिका वडा नं. १४ बस्ने अन्दाजी बर्ष ३१ को आशिष मण्डलको सो इमरजेन्सी वार्डमा उपचार भईरहेको बेला ईमजरेन्सी कक्षमै पसेर मेयर र उनका समूहले डेस्कका कर्मचारीहरुलाई हातपात गरेको अस्पताल सँचालन तथा व्यवस्थापन समितिका अध्यक्ष सोहिन्द्र कुमार यादवले जानकारी दिएका छन् ।

प्रादेशिक अस्पताल प्रशासनका अनुसार, काउण्टरमा रहेका कर्मचारी, ईमरजेन्सी वार्डमा कार्यरत चिकित्सकहरुलाई १५–२० जनाको टोली पसेर कुटपिट, गाली गलौज, हुलहुज्जत गरेको अस्पतालद्धारा जारी गरिएको विज्ञिप्तिमा उल्लेख छ ।

यस सन्दर्भमा जिल्ला प्रहरी कार्यालय सिरहाले शुक्रबार साँझ करिब ८ बजेको समयमा एक सडक दुर्घटना भएको र इमरजेन्सीमा भर्ना भएको बेला तनाव भएको पुष्टि गरेको छ ।

यता, सिरहा नगरपालिकाका मेयर यादवसँग सम्पर्क गर्दा मोबाईलमा सम्पर्क हुन सकेनन् ।