रा.रा.त.ज.ब. क्याम्पस प्रमुख साहको मनमौजी, बिदामा बस्दा पनि सह-प्रमुखलाई मौखिक जिम्मेवारी

न्यूज ब्यूरो, सिरहा । कुनैपनि संस्थाको प्रशासनिक नियमित र समयमा उपस्थित हुनुपर्ने व्यवस्था रहेको छ । तर सिरहाको गोलबजार स्थित रहेको रामप्रताप रामप्रसाद तामङ जनता बहुमुखी क्याम्पस प्रमुख किशोर साहको कार्यालय आउने र बाहिरिने टुङ्गो नहुदाँ पनि सह प्रमुखलाई मौखिक जिम्मेवारी दिएर बाहिरिने गरेका छन् ।

बिहान ६ः३० बजेबाट सञ्चालन हुने क्याम्पसमा क्याम्पस प्रमुख प्रायः आठ बजेपछि आइपुग्छन्। १०:०० नबज्दै क्याम्पसबाट निस्किसकेको हुन्छ। कुनै विद्यार्थी प्रशासनको काम विशेषले १० बजे पछि आए क्याम्पस प्रमुखसँग विरलै भेट हुन्छ।

सोही क्याम्पसमा पढ्ने एक विद्यार्थी नाम नखोल्ने शर्तमा उनले भने, 'क्याम्पस प्रमुख कतिखेर आउनु हुन्छ र कतिखेर निस्कनु हुन्छ त्यसको टुङ्गो नै हुँदैन। प्रायः ८ः३० बजेपछि आउनुहुन्छ र १० नबज्दै निस्कने गरेकोू विद्यार्थीले बताए । क्याम्पस प्रमुखसँग कुनै काम परे भेट्नै मुस्किल हुने विद्यार्थीहरूले गुनासो पोखे ।

क्याम्पस प्रमुख साह धनगढीमाई नपा ११ विष्णुपुरकट्टी स्थित सत्यभामा डोटेल माध्यमिक विद्यालयका स्थायी मा.वि. शिक्षक पनि हुन्। त्यसैले पनि उनी क्याम्पस बिदा नहुँदै पहिले निस्किने गरेका हुन्। क्याम्पसको पूर्णकालीन शिक्षकको रुपमा तलब थपे पनि उनी नियमित क्याम्पसमा उपस्थित नहुँदा विद्यार्थी मारमा पर्ने गरेका छन्।

यतिमात्र होइन, क्याम्पस प्रमुख विशेष कामले बाहिर जानु परे कहिल्यै औपचारिक रुपमा कसैलाई निमित्त नदिने गरेको रहस्य समेत खुलेको छ। क्याम्पस प्रमुखले आफू विशेष कामले बाहिर जाँदा मौखिकरूपमा मात्र जिम्मा दिएर जाने गरेको छ।

पछिल्लो चारदिन देखि पब्लिक क्याम्पस सङ्घको १२ औं राष्ट्रिय महाधिवेशनमा सहभागी हुन काठमाडौं गएका हुन् । क्याम्पसमा उनी उपस्थित नहुँदा सहायक प्रमुखको जिम्मा लिखित रुपम कसैलाई दिइएको छैन। उनी क्याम्पस प्रमुख भएपछि कतै काम विशेषले जाँदा लिखित रुपमा सहायकको जिम्मेवारी दिएकै छैन।

अहिले सहायक क्याम्पस प्रमुख जिम्मेवारी ईश्वर स्याङ्वाले सम्हाल्दै आएका छन्। तर, उनले लिखित रुपमा आफूले जिम्मेवारी नपाएको बताए। उनले भने, ‘क्याम्पस प्रमुख विशेष कामले बाहिर जानुभएको छ, मैले मौखिक जिम्मेवारी पाएको छु, आजसम्म उहाँले लिखित रुपमा कसैलाई जिम्मेवारी दिएको छैन्।’

"पहिला पनि मौखिक नै जिम्मेवारी हुन्थ्यो अहिले पनि यस्तै चलिरहेको छ" स्याङ्वाले भने, ‘संस्थागत रुपमा भन्नु पर्दा लिखित दिएर जानुपर्ने हो तर, बर्षौ देखि यस्तै चलिरहेको छ। लिखित दिने गरेको छैन।’

क्याम्पस प्रमुख साहले भने, आफ्नो अनुपस्थिति कारण विद्यार्थीलाई कुनै समस्या भएको छैन्। क्याम्पसको प्रशासनिक कामले बाहिर निस्किरहनु परे पनि सकेसम्म नियमित क्याम्पस उपस्थित हुनेगरेको छु।’