तीनदिनभित्र शिक्षकहरुको तलब निकासा दिन मेयर यादवलाई ज्ञापन, आन्दोलनको चेतावनी

न्यूज ब्यूरो, जनकपुरधाम । धनुषाको शहिदनगर नगरपालिकाभित्रका समुदायिक विद्यालयका शिक्षकहरुले तलब नपाएको भन्दै नगर प्रमुखलाई ज्ञापन पत्र बुझाएको छ ।

बुधबार शहिदनगर नगरपालिकाको कार्यालय पुगेर पीडित शिक्षकहरुले नगर प्रमुख दिनेश प्रसाद यादवलाई ज्ञापन पत्र बुझाएका हुन् । उनीहरुले आफूहरुको रोकि राखेको तलब भत्ता फुकुवा गरिदिन ज्ञापन पत्र बुझाएका हुन ।

शहिदनगरको पीडित शिक्षक कर्मचारी सँघर्ष समिति गठन गरि मेयर यादवलाई तलब भत्ता फुकुवा गर्न ज्ञापन पत्र बुझाइएको छ । आर्थिक वर्ष २०७८÷०७९ सम्मको सबै तलबभत्ता पाएपनि चालु आर्थिक बर्षमा कुनै तलबभत्ता नपाएको गुनासो गर्दै शिक्षकहरुले मेयरलाई ध्यानाकर्षण गराएका हुन् ।

उनीहरुले तीनदिनभित्र शिक्षकहरुको रोकिराखेको तलबभत्ता उपलब्ध नगराए चरणबद्ध आन्दोलनमा उत्रने चेतावनी समेत दिएको हो । सम्बन्धित विद्यालयका प्रधानाध्यापकले शिक्षकहरुको तलब नै नदिएको भनेर आलटाल गर्दै आएकोप्रति पनि ध्यानाकर्षण गराइएको समितिकी अध्यक्ष पुष्पा यादवले जनाइन् ।