हातीपाईले रोग विरुद्धको औषधी सेवनको लागि घर-घर प्रचार गरौँ : मेयर यादव

न्यूज ब्यूरो, जनकपुरधाम । कमला नगरपालिकाका मेयर विशेश्वर प्रसाद यादवले नगर स्तरिय हातीपाईले रोग विरुद्धको आम औषधि सेवन कार्यक्रममा सम्पूर्ण नगरवासीमा सहभागी हुन अनुरोध गरेका छन् ।

यही फागुन ११ गतेदेखि सुरु हुन लागेको हातीपाईले रोग विरुद्धको औषधी सेवन अभियानमा सम्पूर्ण कमला नगरवासीलाई अनिवार्य सहभागीता जनाई अनिवार्य औषधी सेवन गर्न अनुरोध गरेका छन् ।

नगर स्तरिय योजना तथा बहु निकाय गोष्ठी सप्पन्न , स्वास्थ्यकर्मी लगायत महिला सामुदायिक स्वास्थ्य स्वंम सेविका अभिमुखिकरण को साथै सामुदाय स्तरिय अन्तरक्रीया कार्यक्रममा प्रमुख अतिथिको आसनबाट बोल्दै मेयर यादवले यो रोग लाग्नु भन्दा अघि नै सचेत भई अनिवार्य औषधी खान अपिल गरे ।

फागुन ११ गते विहिबारदेखि नगरपालिकाको स्वास्थ्यका सम्पुर्ण स्वास्थ्यकर्मीहरुको प्रत्यक्ष निगरानी नगरबासिको घर घरमा गई हातीपाईले रोग विरुद्ध औषधि खुवाउने कार्यक्रम रहेको बताउँदै अनिवार्य रुपमा औषधी सेवनको लागि समय मिलाउन मेयर यादवले आग्रह गरे ।

मेयर यादवले हातीपाइले रोग विरुद्धको औषधि सेवन गरि तथा गराई अपांग , अशक्त र कुरुप बनाउने रोगबाट नगरवासीलाई बच्न सार्वजनिक अपिल गरे ।

गोष्ठीमा विशिष्ट अतिथिको रुपमा सहभागी भएका नगरपालिकाका प्रमुख प्रशासकीय अधिकृत उप सचिव ओम प्रकाश महतोले नगरपालिकाकी सम्पूर्ण स्वास्थ्य स्वयंसेविकालाई गहनपूर्वक यस अभियानलाई सफल बनाउन आग्रह गरे ।

उप सचिव महतोले नगरपालिकाको विभिन्न चोक चोराहामा व्यापक प्रचार प्रसार गरी लक्ष्यभन्दा अधिक नगरवासीलाई यस अभियानमा सहभागीता गराउनुपर्ने जिम्मेवारी स्वास्थ्यकर्मीहरुमा भएको उल्लेख गरे ।

अन्तरक्रिया कार्यक्रममा कमला नगरपालिकाका स्वास्थ्य शाखा सँयोजक रामकुमार ठाकुरले आम औषधि सेवनका माध्यमबाट संक्रमणको दरलाई घटाउँदै यस रोगलाई जनस्वास्थ्य समस्याको रुपबाट निवारण गर्ने उदेश्य रहेको बताए । उनले यो औषधी काम छाडेर भएपनि सेवन गर्न अनुरोध गरे ।

राष्ट्रिय हातीपाइले रोग निवारण कार्यक्रमको लक्ष्य बमोजिम सन २०३० सम्म हातीपाईले रोगलाई जनस्वास्थ्य समस्याका रुपमा रहन नदिनको संक्रमणको प्रीभालेन्स एक प्रतिशत भन्दा तल ल्याउने उदेश्य रहेको सँयोजक ठाकुरले थपे ।

कार्यक्रम सँचालन गरेका स्वास्थ्य शाखाका उपसँयोजक अमरेश कुमार यादवले हातीपाईले रोग विरुद्धको औषधी विश्वासिलो र भरपर्दो रहेकोले औषधी अनिवार्य सेवन गर्न आग्रह गरे । उनले नेपाल सरकारबाट प्रमाणिकरण भएको यो औषधीमाथि कुनै प्रकारको शंक उपशंका नरहेको बताए ।

उनले संक्रमित क्षेत्रमा बसोबास गर्ने औषधि सेवन गर्न योग्य सबै व्यक्तिहरुलाई औषधि सेवन गराउने कार्यक्रम रहेको बताए । हातीपाइले रोग विरुद्धको औषधी सेवन अभियान धनुषा जिल्लासहित देशको १५ जिल्लामा सँचालन भईरहेको छ ।

कार्यक्रममा सबै स्वास्थ्यकर्मी, सबै वडाका वडाध्यक्ष, अधिकारकर्मी, उपमेयर शिला देवी मण्डल, समाजसेवी, शिक्षक, पत्रकार, विद्यार्थीहरुको समेत सहभागीता रहेको थियो ।