गाँपा अध्यक्ष यादवमाथि कारवाहीको माग गर्दै चरणवद्ध आन्दोलनको चेतावनी

न्यूज ब्यूरो, जनकपुरधाम । धनुषाको मुखियापट्टि मुसरनीया गाउँपालिकाका अध्यक्ष जय कुमार यादवले कर्मचारीमाथि हातपात गरेको भन्दै कारवाहीको माग गरिएको छ ।

निजामति कर्मचारी युनियन जिल्ला कार्य समिति धनुषाले मँगलबार एक प्रेस विज्ञप्ति जारी गर्दै गत माघ २५ गते सोही गाउँपालिकामा कार्यरत अधिकृत छैँठौँ श्रवण कुमार यादव र आन्तरिक लेखा परीक्षक नविन कुमार साहमाथि गाउँपालिका अध्यक्ष यादवले हातपात गरेको भन्दै कारवाहीको माग गरेको छ ।

कर्मचारीमाथि जनप्रतिनीधिले हातपात र दुरव्यहार गरेको घटनाप्रति खेद प्रकट गर्दै युनियनको जिल्ला कार्यसमितिका सचिव प्रकाश कुमार कर्ण र उपाध्यक्ष चन्द्र नारायण मण्डलले विज्ञप्ती जारी गर्दै कारवाहीको माग गरेका छन् ।

समितिले पीडित कर्मचारीहरुसँग न्याय नभए चरणबद्ध आन्दोलनको चेतावनी समेत विज्ञप्ति मार्फत दिएका छन् ।