जनकपुरमा मन्दिर र विद्यालय आसपास मदिराजन्य विक्री रोकको आदेश कार्यन्वयन गराउन ज्ञापन

न्यूज ब्यूरो, जनकपुरधाम । धार्मिक नगरी भनिने मधेश प्रदेशको राजधानी जनकपुरधाममा प्रशासनले लगाएको विभिन्न नियमहरु कार्यन्वयनको लागि ज्ञापन पत्र बुझाइएको छ ।

धनुषामा नयाँ आएका प्रमुख जिल्ला अधिकारी काशिराज दाहाललाई नागरिक समाजका मुरली मनोहर मिश्रको नेतृत्वमा गएको टोलीले निर्णयहरु कार्यन्वयनको लागि ज्ञापन पत्र बुझाएका छन् ।

सो क्रममा जानकी मन्दिरको फूलबारी अतिक्रमण भएको पुष्टि भएपछि प्रतिवेदन अझै प्रभावकारी रुपमा कार्यन्वयन नभएको भन्दै सो कार्यन्वयनको लागि ज्ञापन पत्र बुझाएको हो ।

यस्तै, जनकपुरधामस्थित रहेको देवालय, मठ मन्दिर र स्कूल कलेजहरुको २०० मिटरभित्र मदिरा, माछा, मासु विक्रि वितरणमा प्रशासनले नै लगाएको रोक आदेश कार्यन्वयनको लागि माग गरेका छन् ।

मिश्र नेतृत्वको टोलीले जानकी मन्दिरमा शुद्ध खानेपानीको लागि सहजता गर्न माग गरेका छन् । उनीहरुले जनकपुरको तेलहा, मरहा पोखरीको सौन्दर्यीकरणको लागि पनि दबाब दिएका थिए ।