मोदीको जनकपुर भ्रमणले बोर्डरमा सुरक्षा टाईट

न्यूज ब्यूरो ||
जनकपुरधाम, २१ बैशाख । भारतीय प्रधानमन्त्री नरेन्द्र मोदीको आसन्न जनकपुर भ्रमणलाई पूर्ण सुरक्षित बनाउन नेपाल भारतको सीमा नाका सुरक्षा व्यवस्था चुस्त पारिएको छ ।

बिहिवार सुरक्षाका सबै निकाय, सुरक्षा अधिकारीहरुको बैठक मुख्यमन्त्री लालबाबु राउतसित भएको छ ।

नेपाली सेना, नेपाल प्रहरी, सशस्त्र प्रहरी र अनुसन्धान विभागका प्रमुखहरुको बैठकमा सहभागिता थियो ।

‘नेपाल भारतको खुल्ला सीमा सुरक्षा चुनौती रहेको छ ’बैठकमा अधिकारीहरुले खुला सीमा क्षेत्रमा उच्च सुरक्षा सतर्कता अपनाउन मातहतका निकायहरुलाई निर्देशन दिएको ब्रिफिंग गरे ।

आठवटै जिल्लाको सीमा क्षेत्रमा सतर्कता अपनाउन सुरक्षा निकायलाई निर्देशन दिइएको प्रदेश नं २ का आन्तरिक मामिला तथा कानूनमन्त्री ज्ञानेन्द्र यादवले बताए ।

होटल र लजमा निगरानी राखी भारतबाट नेपाल तथा नेपालबाट भारततर्फ जाने यात्रु र सवारी साधनलाई निगरानी गरी जाँच गर्नेबारे छलफल भएको उनले जनाए ।

भारतीय सुरक्षा अधिकारीहरुको समेत सहभागिता रहेको उक्त बैठकमा बारहबिघा, जानकी मन्दिर लगायतलाई केन्द्रमा राखी नगरभरी नै सुरक्षाको कडा प्रबन्ध मिलाईने सम्बन्धमा छलफल भएको मन्त्री यादवले जनाए ।

प्रदेश मुख्यमन्त्री लालबाबु राउतले सुरक्षा सम्बन्धी छलफलमा नियमित रुपमा सहभागि भईरहेका छन् ।सुरक्षा र स्वागतमा कुनै कसर बाँकी रहन नदिन सबै सुरक्षा निकायलाई परिचालन गरिएकोछ ।

भारतीय प्रधानमन्त्री मोदीको भ्रमणका क्रममा कुनै पनि अवाञ्छनीय क्रियाकलाप नहोस् भनेर सुरक्षा निकायलाई कडा निर्देशन दिइएको जानकारी दिँदै उनले भने, सबै तहका सुरक्षा निकायका प्रमुख तथा मातहतका सुरक्षा निकाय सतर्क हुनेबारे छलफल भएको छ ।’

संघिय सरकारको गृहमन्त्री, नेपाल प्रहरीका प्रमुख, सशस्त्र प्रहरीका प्रमुख, अनुसन्धान विभागका प्रमुख, नेपाली सेनाका प्रमुख लगायतले मंगलवार यहाँको सुरक्षा प्रबन्धबारे जानकारी लिई मातहतका अधिकारीहरुलाई सुरक्षा प्रबन्ध मिलाउन आवश्यक निर्देशन दिएका थिए ।

बुधवार भारतीय उच्च सुरक्षा अधिकारीहरुले बारहबिघामा हेलिकोप्टरको अवतरण परीक्षण गरे ।जानकी मन्दिर, बारहबिघा र बैकल्पिक व्यवस्था विमान स्थलको सुरक्षा अवस्थाबारे भारतीय अधिकारीहरुले जानकारी लिए ।

भारतका उच्च सुरक्षा अधिकारीहरुको टोली दिनहुँ सुरक्षा प्रबन्ध सम्बन्धी छलफल अनुगमनमा सकृय छन् ।नेपाली सुरक्षा अधिकारीहरु समन्वय गरी सुरक्षा प्रबन्धलाई चुस्त बनाएका छन् ।

बारहबिघा लगायत जानकी मन्दिरमा सुरक्षा जाँचलाई अत्यन्त कडा बनाईएको छ । नगर क्षेत्रमा सवारी साधनहरुको चेकजाँच बढाईएको छ भनेर आजको जनकपुर टुडे दैनिकको मुख्य पृष्ठमा समाचार छ ।