मिर्चैयामा निःशुल्क महिला प्रजनन स्वास्थ्य र अप्रेसन शिविरमा ५ सय बढी लाभान्वित

न्यूज ब्यूरो, सिरहा । मिर्चैयामा दुईदिने निःशुल्क महिला प्रजनन स्वास्थ्य र अप्रेसन शिविर सम्पन्न भएको छ । मिर्चैया नगरपालिका र लायन्स क्लब अफ मिर्चैया सिटीको संयुक्त आयोजनामा उक्त शिविर सञ्चालन भएको हो ।

शिविरमा ५ सय २१ जनाले लाभ लिएका छन् । यसमध्ये आङ खसेका ९ जना, पाठेघरको मुखको क्यान्सरको पूर्वावस्थाको भीआइए जाँच पोजिटिभ भएका २० जनाले पनि सेवा लिएका छन् ।

मिर्चैया अस्पतालमा सम्पन्न यो शिविरमा प्राविधिक सहयोग सामुदायिक सेवा प्रतिष्ठानको रहेको थियो भने अस्पतालकी मेडिकल सुपरिटेन्डेन्ट स्त्रीरोग विशेषज्ञ डा। शारिका गोइतलगायतले सेवा दिएका थिए ।

आर्थिक अवस्था र अचेतनाका कारण ग्रामीण क्षेत्रका महिलाहरू स्वास्थ्य जाँच गराउन नसकिरहेका बेला गरिएको यो शिविरलाई यहाँका बुद्धिजीवीहरुले प्रशंसा गरेका छन् ।

यस्ता कार्यक्रमहरु गरिरहने लायन्स क्लव अफ मिर्चैया सिटीका अध्यक्ष अशोक कुमार साहले प्रतिबद्धता जनाए ।