उमेशको ब्लडमनी बारे कुनै फैसला भएको छैन : राजदुतावास

न्यूज ब्यूरो ||
जनकपुरधाम, १९ बैशाख । पाकिस्तानी नागरिक मो. लतिफ वसिरको हत्या गरेको आरोपमा विगत १२ वर्षदेखि सउदी अरेबियाको जेलमा रहेका धनुषाको उमेश यादवको ब्लडमनी बारे कुनै पनि प्रकारको फैसला नभएको स्पष्ट गरिएको छ ।

सउदी स्थित रहेको नेपाली दुतावासले बुधबार एक प्रेस विज्ञप्ति जारी गर्दै उमेशको ब्लडमनी बारे कुनै पनि प्रकारको फैसला सउदी अदालतबाट नभएको र ब्लडमनीको सम्बन्धमा कुनै पनि जानकारी नरहेको स्पष्ट गरिएको छ ।

उमेश यादवको विषयमा नेपाली मिडियाहरुले राजदुत एवम् दुतावासका कर्मचारीहरु लगायत उदृत गरेकोप्रति ध्यानाकर्षण गर्दै ब्लडमनीको बारेमा कुनै पनि प्रकारको जानकारी नभएको उल्लेख गरिएको छ ।

उमेश यादव बचाउको लागि राजदुतावासले कानुनी उपाय खोजी गरी बचाउको लागि उच्च प्राथमिकताका साथ काम गरिरहेको उल्लेख गरिएको छ ।

गत १५ अप्रिल २०१८ मा उमेशलाई मृत्यूदण्डको सजाय हुने गरी फैसला गरेकोमा उक्त फैसला उपर चित नबुझेकोले उमेश यादवको बचाउको लागि राजदुतावासद्धारा गत २६ अप्रिल २०१८ मा पुनरावेदन समेत गरिसकेको जनाईएको छ ।

नेपालबाट एनजिओ ग्रोविन्ग नेपाल फाउण्डेशनका अध्यक्ष सरोज रायले पीििडत परिवारसँग भेट गर्न पाकिस्तान पुगेको र ब्लडमनी रु. ३० लाख दिएपछि मात्र उमेशको नाममा माफीनामा दिने भनेको बताएपछि देशविदेशबाट उमेश बचाउको लागि ब्लडमनी सँकलन कार्य सुरु गरिएको थियो ।

उमेश बचाउको लागि राजदुतावासले सक्दो कानुनी प्रयास जारी राखेको तथा प्राईभेट राईट र ब्लडमनीको विषया फैसला केही उल्लेख नभएकोले ब्लडमनी सँकलन गर्ने र उक्त रकम पीडित परिवारलाई बुझाएपछि माफी पाउने विषयमा राजदुतावासबाट कुनै व्यक्ति तथा निकायलाई जानकारी नगराइएको स्पष्ट गरिएको छ ।

पाकिस्तान पुगेका एनजिओ ग्रोविन्ग नेपालका अध्यक्ष सरोज रायले पीडित परिवारसँग ब्लडमनीको लागि सेटलमेन्ट भएको तथा ब्लडमनी बुझाएपछि मात्र माफीनामा दिने जानकारी गराएपछि विभिन्न सँचारमाध्यमहरुले समाचार प्रकाशित प्रकाशन गरेको थियो ।

हालाकी, रायले पाकिस्तानी पीडित परिवारसँग रु. ३० लाखको ब्लडमनी सम्झौता भएको अधिकारिक जानकारी र सबुत पत्र भने अझ थपेका छैनन् ।

यता, पाकिस्तानमै रहेका बेला रायले पाकिस्तानस्थित रहेको नेपाली राजदुतावास मार्फत परराष्ट्रय मन्त्रालय र राजदुतावासमा समेत जानकारीहरु पठाउनको लागि पत्र काटिएको देखिएको छ ।

पाकिस्तानको ईस्लामाबाद स्थित रहेको नेपाली दुतावासले सिँहदरबार र रियाद स्थित रहेको नेपाली राजदुतावासलाई सम्बोधन गर्दै उमेश यादवबारे पत्रहरु पठाइएको भनेर गत बैशाख १४ गते काटिएको पत्रमा उल्लेख गरिएको छ ।

पाकिस्तानमै रहेका बेला न्यूज ब्यूरो र रायबीच मेसेन्जरमा भएको कुराकानीको आधारमा रायले पाकिस्तानबाट निरन्तर सउदी स्थित रहेको दुतावाससँग सम्पर्कमा रहेको तथा माफीनामा पत्रको बारेमा जानकारी गराइएको दाबी गरेका थिए ।

यता, पाकिस्तानी पीडित परिवारसँग समन्वय गरेका ग्रोविन्ग नेपाल फाउण्डेशन गैर सरकारी सँस्थाका अध्यक्ष सरोज रायसँग दुतवासले बुधबार जारी गरेको विज्ञप्ति उपर बुझ्न खोज्दा सम्पर्क हुन सकेको छैन । रायसँग फोन मार्फत कुरा गर्न खोज्दा उनले फोन उठाएका छैनन् ।

दुतावासको प्रेस विज्ञप्ति जारी भएपछि उमेशको लागि सँकलन जारी रहेको ब्लडमनी सँकलन गर्ने वा नगर्ने भनेर अलमलता थपिएको छ । भने ब्लडमनीको लागि अधिकारिक भनेर प्रदान गरिएको बैँक खाता नं. ग्रोविन्ग फाउण्डेशनको नाममा रहेको तथा कुनै प्रकारको रकमको हिनामिना भए आफूसँग सम्पर्क गर्न रायले फेसबुक मार्फत भिडियो सन्देश समेत दिएका हुन् ।

तर अहिलेसम्म के कति रकम सँकलन भएको र माग गरिएको रकममा कति अपुग रहेको छ भनेर कुनै प्रकारको जानकारी र पार्दर्शीता भने गरिएको छैन ।

बैँक खाता नम्बर जारी गर्दै पूर्ण पार्दर्शीताको प्रतिवद्धता समेत रायले जनाएका छन् भने अहिलेसम्म कुनै प्रकारको जानकारी नदिदा सस्तो लोकप्रियताको लागि मात्र यस्तो गरेको गुनासो समेत गरिएको छ ।

राजदुतावासले ब्लडमनीको बारेमा कुनै फैसला नभएको तथा कुनै पनि प्रकारको सुचना नआएको भनेर प्रेस विज्ञप्ति जारी गरेपछि राय उपर प्रश्नचिन्ह तेर्साइएको छ ।

नेपाल स्थित परराष्ट्रय मन्त्रालय, पाकिस्तानी दुतावास र पाकिस्तान स्थित पीडित परिवारसम्म भएको सबै खाले सुचना तथा समाचार सरोज रायको जानकारी र बयानको आधारमा न्यूज ब्यूरोले समेत सम्प्रेसन गर्दै आएको छ ।