जनकपुरको कालो दिन : बम काण्डको आज ६ औँ वर्ष ! (भिडियो सहित)

न्यूज ब्यूरो ||
जनकपुरधाम, १८ बैशाख । ५ जनाको ज्यान जाने गरी गराइएको बम विस्फोटको आज ६ वर्ष पुरा भएको छ ।

आजभन्दा ६ वर्ष अघि वि.स. २०६९ बैशाख १८ गते आजकै दिन जनकपुरको रामानन्दचोकमा भयानक बम काण्ड भएको थियो ।

मिथिला राज्य संघर्ष समितिले मिथिला राज्यको माग गर्दै शान्ति पूर्ण धर्ना बसेको बेला विहान करिब ११ बजे सुनियोजित ढँगले गराइएको बम विष्फोटमा परी पाँच जनाको ज्यान गएको थियो भने दर्जनौ घाईते भएका थिए ।

बम विस्फोटमा मिनापकी दिग्गज कलाकार रंजु झा सहित झगरु मण्डल, बिमल शरण दास, दिपेन्द्र दास, सुरेश उपाध्यायको मृत्यु भएको थियो ।

बम विष्फोट घटनाका मुख्य योजनाकार मानिएका पूर्व साँसद संजय कुमार साह कारागारमा जीवन विताइरहेका छन् भने त्यस्तै घटनामा संलग्न आरोपमा मुकेश चौधरी , राजन मुक्ति लगायत आधा दर्जन अभियुक्तहरु समेत दोषी करार दिइएको छ ।

जनकपुरको लागि कालो दिवसको रुपमा मनाइने त्यो दिनलाई स्मरण गर्दै आज मिनापले बलिदानी दिवस मनाउने भएको छ ।

मिनापका अध्यक्ष सुनिल मल्लिक भन्छन्, "आज बैशाख १८ गते मिथिलाको शहिदको बलिदानी दिवस छ, २०६९ साल बैशाख १८ गते त्यो कालो दिन कसरी विर्सिन सक्छ र ? अहिले प्रदेश नं. २ जो की वास्तविक मिथिला प्रदेश हो । यसमा सबै मैथिल अनुरागीगण मिनापमा उस्थित भई मिथिलाको नाममा शहादत दिएका शहिदहरुको उर्जालाई मनमा समेटेर प्रदेश २ को नामाकरण मिथिला तथा प्रदेशको भाषा मैथिली हुनको लागि आवाज बुलन्द गर्नुपर्छ ।"

आत्मियताको पहिचान, स्वायतताको बोधको लागि, आफनो हक अधिकारको लागि, संवैधानिक सुनिश्चितता गर्नको लागि, सँविधानमा सुनिश्चित गर्नको लागि कलाकर्मी, रचनाधर्मीहरु मिथिला राज्य सँघर्ष समितिलाई सघाउनुपर्ने मिथिला राज्य सँघर्ष समितिका सँयोजक परमेश्वर कापडीले न्यूज ब्यूरोसँग भने ।

"भाषा, माटो र सँस्कृतिको लागि लडेको यो विश्वमै दोस्रो आन्दोलन हो , पहिलो पटक बँगलादेशमा यस्तो आन्दोलन भएको थियो भने विश्वमै दोस्रो पटक नेपालको जनकपुरमा भएको ईतिहास छ । आफ्नो पहिचानको लागि जारी रहेको यो आन्दोनल उपलब्धी नहुन्जेलसम्म जारी रहनेछ ।" उनले थपे ।

जनकपुरमा कालो दिवसको रुपमा मनाइने बैशाख १८ लाई स्मरण गर्दै विभिन्न सँघसँस्थाहरुले समेत बलिदानी दिवसको आयोजना गरेको हो ।