जनताराजः सरकारी अस्पतालमै उत्तम उपचारको लागि डा. सिके राउतको यस्तो कदम

न्यूज ब्यूरो, राजविराज । सरकारी अस्पतालमा काम गर्ने चिकित्सकहरुले आफ्नो नीजि क्लीनिकमा पठाउने व्यापाक गुनासोपछि जनमत पार्टीका अध्यक्ष डा. सिके राउतले नयाँ कदम चालेका छन् ।

गरिब, विपन्न, मध्यम वर्गीय परिवारलाई सरकारी अस्पतालमै सुविधाजनक उपचारको लागि सरकारले सुविधा दिएपनि निजी क्लीनिक र अस्पतालमा पठाउने उदेश्यले सरकारी अस्पतालमा उपचार नगर्ने गरेको गुनासोपछि सप्तरीको अस्पतालमा बोर्ड लगाईएको छ ।

तपाईको उपचार किन र के कारणले यही अस्पताल नभएको भनेर डाक्टरको पूर्जासहितको फोटोकापी र उजुरी समेत उजुरी पेटिकामा हाल्न अनुरोध गरिएको छ ।

जनमत पार्टीका अध्यक्ष डा. सिके राउत, सप्तरी निर्वाचन क्षेत्र नम्बर २ (क) का प्रदेश साँसद सतिश कुमार सिँह र (ख) का रामबाबु यादवले सँयुक्त रुपमा अस्पतालमा उजुरी पेटिका राखेका छन् ।

सरकारी अस्पतालमा उपचार गराउन जाने विरामीहरुलाई दुरव्यवहार, उपचार नै नगर्ने, दलाल मार्फत नीजि क्लीनिकमा पठाई चर्को रकम असुल्ने गरेको गुनासोपछि उजुरी पेटिका राखिएको हो ।

अब सरकारी अस्पतालमा सेवासुविधासहित उपचार नभए उजुरी पेटिकामा उजुरी हालिएमा त्यसको सुधारको लागि डा. राउत नेतृत्वको जनमत पार्टीले एक्सन लिने भएको छ ।

डा. सिके राउतले ल्याएको जनताराजको अवधारणको पहिलो पाईलाको सुरुवात गरिएको छ ।