महाविनाशकारी भुकम्पको आज ३ वर्ष पुरा, काला दिनको त्यो क्षण !

न्यूज ब्यूरो ||
जनकपुरधाम, १२ बैशाख । नेपालमा महाविनाशकारी भुकम्प गएको आज ३ वर्ष पुरा भएको छ ।

गत वि.स. २०७२ साल बैशाख १२ गते गएको महाविनाशकारी भुकम्पले झण्डै १० हजार नेपालीको ज्यान लिएको दिनलाई सम्झना गर्दै आज कालो दिनको रुपमा सम्झिएको हो ।

नेपालको गोरखाको बारपाकलाई केन्द्रविन्दु बनाएर आएको ७.६ रेक्टर स्केलको महाशक्तिशाली विनाशकारी भुकम्पले मानविय क्षति सहित अर्बौ खर्बौको धनमाल समेतको क्षति भएको स्मरण सहित कालो दिनको सम्झना गरिएको छ ।

सरकारले भुकम्प पीडितहरुकोे लागि घोषणा गरेको राहत तथा सरकारी अनुदानबाट अहिले सम्म धेरै नै घर बन्न बाँकी रहेको छ भने क्षतिग्रस्त ७ सय भन्दा बढी ऐतिहासिक सम्पदाहरुको पुनर्निर्माण सुरु भएपनि सबै ठाउँमा पूर्णता पाउन सकेको छैन ।

राजनीतिक टकराव र नीतिगत झण्झटमा पुनर्निर्माण प्राधिकरण अल्झिदा पुनर्निर्माणको कामले गति लिन नसकेको हो ।

पुनर्निर्माणका लागि ४ खर्ब भन्दा बढीको वैदेशिक सहायता प्रतिवद्धता आएपनि प्रभावकारी काम हुन सकेको छैन भने नीतिगत अन्यौलका कारण दाताले घोषणा गरेको रकम समेत आउन सकेको छैन ।

वि.स. २०७२ साल बैशाख १२ गते १२ बजेर ५२ मिनेटमा गोरखाको बारपाक केन्द्रविन्दु बनाएर भुकम्प गएको थियो ।