कमला नगरपालिकाको खर्च विवरण सार्वजनिक गर्न सँजालको माग

न्यूज ब्यूरो, जनकपुरधाम । पूर्वी धनुषाको कमला नगरपालिकामा गत आर्थिक बर्षको खर्च विवरण पारदर्शी गर्न कमला युवा सँजालले ज्ञापन पत्र बुझाएको छ ।

कमला युवा सँजालका पदाधिकारीहरुले आईतबार विभिन्न निकायमा कमला नगरपालिका यथाशिघ्र सँचालन गर्नको लागि ज्ञापन पत्र बुझाएको हो । सँजालका पदाधिकारीहरुले विभिन्न माग राखी ज्ञापन पत्र बुझाएको हो ।

कमला युवा सँजालका अध्यक्ष बिमलेश यादवको नेतृत्वमा गएको टोलीले ईलाका प्रहरी कार्यालय खजुरीसहित कमला नगरपालिकाको विभिन्न वडामै पुगेर वडाध्यक्षहरुलाई खर्च विवरण देखिने गरी सार्वजनिक टाँस गर्न आग्रह गरेका छन् ।

सँजालले ११ बुँदे माग पेश गरी विभिन्न वडाका वडाध्यक्षहरुलाई जनभावना बमोजिम पारदर्शी तवरले कार्यहरु गर्नुपर्ने आग्रह गरिएको छ ।

कमला नगरपालिकामा शिक्षा, स्वास्थ्य, कृषि जस्ता क्षेत्रलाई प्राथमिकतामा राखी बजेट विनियोजन गर्नुपर्ने, नगरपालिका सुख्खा क्षेत्र भएकोले ठाउँ ठाउँमा अटोमेटिक बोरिँग जडान गर्नुपर्ने, विभिन्न विद्यालयमा व्यवस्थापन समिति गठन गरी शिक्षा क्षेत्रमा गुणात्मक सुधार ल्याउनुपर्ने, वृद्धभत्ता समयमै वितरण गर्नुपर्ने लगायतका ११ बुँदे मागसहित जनप्रतिनीधिहरुलाई ध्यानाकर्षण गराएको हो ।

ज्ञापन पत्रको लागि कमला युवा सँजालका महासचिव चन्द्रदीप यादवसहित अन्य सदस्यहरुको उपस्थिति रहेको थियो ।