जनकपुरः कमला नगरपालिकामा पुनः मतदान

न्यूज ब्यूरो, जनकपुरधाम । मधेश प्रदेशको धनुषा जिल्लास्थित रहेको कमला नगरपालिकाको एक बुथमा पुनः मतदान भईरहेको छ ।

मतदान केन्द्रमा मत खसाएर घर गएका मतदाताहरुलाई पुनः बोलाएर पुनः मतदान गर्न लगाएको हो ।

धनुषाको निर्वाचन क्षेत्र नम्बर २ मा अवस्थित कमला नगरपालिका वडा नं. ६ मडानमा रहेको बिलट बौकु मावि (क) केन्द्रको मतदान बिहान ७ बजेदेखि नै सुरु भई ७३ जनाले मत खसाइसकेको अवस्थामा प्राविधिक त्रुटी भेटिएपछि मतदान स्थगित गरिएको थियो ।

त्यस मतदान केन्द्रमा खटिएका कर्मचारीले प्रदेशसभाको ब्यालेट पेपर सुरुमै राखेर त्रुटी गर्दा विवाद उत्पन्न भएको थियो ।

बिहान ९ बजेसम्म खसेको ७३ वटै मतलाई बदर गरी त्यहाँ दिउँसो १ बजेदेखि पुनः मतदान सुरु भएको मतदान अधिकृत धर्मअवतार कोइरालाले जानकारी दिए ।