ओरकेष्ट्रा नचाएर भीड जम्मा पार्दै एमाले–जसपाका नेता जालिम मियाँ र कलवार

न्यूज ब्यूरो, वीरगँज । जनता समाजवादी पार्टी (जसपा) र एमाले पार्टीबीचको गठबन्धनपछि पर्साका दुई उम्मेदवारले भीड जम्मा पार्न विभिन्न स्थानमा ओरकेष्ट्रा नचाउने गरेको पाइएको छ ।

मधेश प्रदेशको पर्सा जिल्लाको निर्वाचन क्षेत्र नम्बर ४ बाट प्रतिनीधिसभाका उम्मेदवार जालिम मियाँ र सोही क्षेत्रको प्रदेश साँसदको लागि (ख) बाट उम्मेदवारी दिएका जसपाका उम्मेदवार सिँगासन साह कलवारले चुनावी कार्यक्रममा भीड जुटाउन ओरकेष्ट्रा (केटी नाच) नचाएर भीड जम्मा पार्न थालेका छन् ।

चुनावी प्रचार प्रसारको क्रममा स्थानीयहरु नआउन थालेपछि दुवै उम्मेदवारले भीड जम्मा पार्नको लागि टिकटोकमा नाच्ने नर्तकी, ओरकेष्ट्रामा नाच्ने नर्तकीहरुलाई बोलाएर नाच गर्न लगाएको देखिएको छ ।

निर्वाचन आयोगले चुनावी प्रचार प्रसारको क्रममा यस्ता प्रकारको कार्यक्रमहरु गर्न नपाउने स्पष्ट व्यवस्था गरेपनि एमाले–जसपा गठबन्धनको उम्मेदवार जालिम मियाँ र सिँगासन साह कलवार मिलेर सर्वसाधारण जम्मा पार्न ओरकेष्ट्रा नचाउन थालेका छन् ।

मधेश प्रदेशको विभिन्न जिल्लामा ओरकेष्ट्रा नाच प्रतिवन्ध गरिएको छ । पर्सा जिल्लामा समेत यस्ता प्रकारको नाचगान, अश्लिल नृत्य, अश्लिल गीतमा नृत्य गर्न स्थानीय प्रशासनले रोक लगाएपनि मियाँ र कलवार मिलेर निर्वाचन आचारसंहिताको समेत धज्जिया उडाएको देखिएको छ ।

मँगलबार कालिकामाई गाउँपालिकाको वडा नम्बर २ भेडिहारीस्थित आयोजना गरिएको चुनावी प्रचार प्रसारको क्रममा स्थानीय सर्वसाधारणहरु नआउन थालेपछि ओरकेष्ट्रा नचाउन थालिएको हो ।

यसअघि विभिन्न स्थानमा गरिएको घरदैलो तथा चुनावी कार्यक्रममा अपेक्षाकृत सर्वसाधारणहरु आउन छाडेपनि दुवै उम्मेदवारले टिकटोकियाहरुलाई स्टेजमा नचाउन थालेका हुन् । सो क्रममा अश्लिल गीतहरुमा नृत्य गरिएको थियो ।

यसअघि प्रदेश साँसद रहेका सिँगासन साह कलवारमाथि पोखरी सौन्दर्यीकरणको नाममा प्रदेश सरकारबाट करोडौंको बजेट लगेर भ्रष्टाचार गरेको आरोप लगाइएको छ । जालिम मियाँ यसअघि गाउँपालिका अध्यक्ष बनेका थिए भने यसपाली एमालेबाट प्रतिनीधिसभा सदस्यका उम्मेदवार हुन् ।

मियाँ र कलवारको उपस्थितिमा ७ बजे सम्मको समय सिमालाई वास्ता नगरि कार्यक्रम गरिएको थियो । स्थानियको बिरोध पछि कार्यक्रम रोकिन दुबै उम्मेदवार बाध्य बनेका थिए ।