आफ्नो क्षेत्रमा शिक्षा सुधारको नमुना कार्यहरु गरेको छु, जनता मलाई पत्याउँछः राम अशिष यादव

न्यूज ब्यूरो, जनकपुरधाम । धनुषा निर्वाचन क्षेत्र नम्बर २ (ख) बाट जनता समाजवादी पार्टीका उम्मेदवार राम अशिष यादवले आफू साँसद हुँदा क्षेत्रमा सबभन्दा बढी शिक्षा सुधारको कार्यहरु गरेकोले जनता पत्याउने दाबी गरेका छन् ।

यही मँसिर ४ गते हुन लागेको प्रतिनीधिसभा सदस्य तथा प्रदेशसभा सदस्य निर्वाचनमा धनुषा निर्वाचन क्षेत्र नम्बर २ (ख) बाट दोस्रो पटक उम्मेदवारी दिएका यादवले आफ्नो क्षेत्रमा ५ बर्षको अवधीमा शिक्षाको नमुना कार्यहरु गरेको बताएका छन् ।

प्रदेश साँसद हुँदा संसदीय विकास कोष मार्फत क्षेत्रको हरेक गाउँमा समुदायिक भवन निर्माण, पक्की सडक निर्माण गर्नुको साथै सबभन्दा अधिक लगानी विद्यालय क्षेत्रमा गरेको बताए ।

उनले टिल्ही, पौडेश्वर, कनकपटिट्, औरही, चक्कर, यदुकूहा, ननुपटिट्, बालगँगा लगायतमा विद्यालयको अवस्थामा व्यापक सुधार गरेको बताए । उनले जनतालाई चाहेको विकास दिन पूर्ण सफल नभएपनि मनोभावना बमोजिम विकास निर्माणको कार्यहरु गरेर देखाएको बताए ।

“यस क्षेत्रका जनताहरुमा मप्रति बेग्लै उत्साह छ । गत २०७४ सालको चुनावमा म निर्वाचित भएपछि आफ्नो क्षेत्रमा नियमित रुपमा जनतासँग भेटघाट गर्दै आएको छु । कोही नेता जितेर गएपछि पुनः फर्केर आएनन भन्ने थेगो जनतामा छाडेको छैन् । त्यसैले जनता मलाई पत्याउँछन् ।”

शिक्षा सुधार अभियानको सँकल्प लिएका समाजसेवी समेत रहेका उम्मेदवार रामअशिष यादवले आफ्नो क्षेत्रमा पोखरी सौन्दर्यीकरण, वातावरण हरियाली अभियानलाई पनि उतिकै तिव्रता दिएका थिए । साँसद हुँदा उनले आफनो क्षेत्रको विभिन्न स्थानमा वृक्षारोपण, किसानलाई राहत, पोखरी सौन्दर्यीकरण, विद्यालय सुधार, बालबालिकालाई प्रोत्साहन लगायका कार्यहरु गर्दै आएका छन् ।

गँगासागर सफाई अभियानका सँयोजक समेत रहेका उम्मेदवार यादवले रँगविरँगी उम्मेदवारको बीचमा जनताले जसपाको तर्फबाट छाता छापमै मतदान गर्ने बताए ।